Tags-Dil

saada huuñ maiñ hai dil ko mire sādgī aziiz
donoñ ko ḳhud-numā.ī kī aadat nahīñ qubūl

dard hotā to sar-e-shām sambhal bhī jaatā
dil hai vo lashkar-e-armān ki jī jāntā hai

kis dil se ham irāda-e-tark-e-junūñ kareñ
mumkin nahīñ ki ḳhvāhish-e-sahrā kā ḳhuuñ kareñ

phūlī hai shafaq go ki abhī shaam nahīñ hai
hai dil meñ vo ġham jis kā koī naam nahīñ hai

apne gird-o-pesh kā bhī kuchh patā rakh
dil kī duniyā to magar sab se judā rakh

aa hī jā.egī udāsī baal khole
aaj apne dil kā darvāza khulā rakh

sansanātī raat ke aane se pahle
dil meñ jaatī dhuup kā TukḌā sajā rakh

besh-qīmat haiñ ye dil ke zaḳhm 'pāshī'
in charāġhoñ ko havāoñ se bachā rakh

kahīñ ye taskīn-e-dil na dekhī kahīñ ye ārām-e-jāñ na dekhā
tumhāre dar kī jo ḳhaak paa.ī to ham ne sū-e-jināñ na dekhā

baḌī chamak āftāb meñ thī ajab damak māhtāb meñ thī
uchhāl dī ḳhāk-e-dil jo ham ne kisī ko phir zau-fishāñ na dekhā

hazār phūloñ meñ dilkashī ho banā.e gulshan hai ḳhār-o-ḳhas par
vo kyā chaman hai ki jis chaman ne nashāt-e-daur-e-ḳhizāñ na dekhā

rukī rukī nabz Dūbtā dil ukhaḌtī sāñseñ bhaTaktī āñkheñ
tumhāre hī dekhne ke qābil thā tum ne hī ye samāñ na dekhā

kabhī purāne ġhamoñ kī sozish kabhī na.ī kashmakash kā khaTkā
dil-e-girafta ko shādmānī meñ bhī kabhī shādmāñ na dekhā

hazār kī tū ne harza-goī magar kahā mudda.ā na dil kā
jo sach kaheñ to zamāne meñ 'kaif' tujh sā bhī be-zabāñ na dekhā

rakhī hai chaah terī aah betāb
qalaq is mere dil kā tū miTā jā

agar jaatā hai ai mere masīhā
ilaaj is dard-e-dil kā tū batā jā

mirī siina pe rakh dast-e-nigārīñ
mirī ye aag dil kī tū bujhā jā

aap hī se bahāreñ haiñ varna
baaġh dil ke khile nahīñ hote

dostī rāste kī mat karnā
dil safar meñ mile nahīñ hote

ab ki ik umar kī mahrūmī se
dil ne samjhauta sā kar rakkhā thā