Tags-Dil

yak jaan na ho sakiye anjān na ban sakiye
yuuñ TuuT ga.ī dil meñ shamshīr-e-shanāsā.ī

us tan kī taraf dekho jo qatl-gah-e-dil hai
kyā rakkhā hai maqtal meñ ai chashm-e-tamāshā.ī

dil ye kahtā hai kahīñ aur chale jaa.eñ jahāñ
koī darvāza abas vā ho, na be-kār koī

aur dil kahtā hai har baar chalo lauT chalo
is se pahle ki vahāñ jaa.eñ to ye dukh bhī na ho

ye kiran kahīñ mire dil meñ aag lagā na de
ye muā.ina mujhe sarsarī nahīñ lag rahā

apnī sūrat dekhnā ho apne dil meñ dekhiye
dil sā duniyā meñ koī bhī aa.ina miltā nahīñ

shāḳh-e-dil phir se harī hone lagī dekho 'nasīr'
aisā lagtā hai kisī kā āshiyāñ ho jā.egā

ġham-e-hayāt ko phailā de āsmānoñ tak
dil-e-tabāh ko vus.at bhī kuchh ziyāda de

chamak de chāñd ko ThanDak havā ko dil ko umañg
udaas qisse ko phir ek shāhzāda de

murġh-e-dil mardum-e-bīmār pe sadqa kar Daal
vāste sehhat-e-jāñ ke amal-e-tair to hai

yuuñ to behad saḳhī thā dil kā 'amīr'
vo magar sāhab-e-nisāb na thā

maiñ tirī māntā lekin jo mirā dil hai nā
dar kā patthar hai haTānā ise mushkil hai nā

turra use jo husn-e-dil-āzār ne kiyā
andher gesū-e-siyah-e-yār ne kiyā

turra kī tarah se dil-e-āshiq ko pech meñ
kis kis lapeT se tirī dastār ne kiyā

haklā ke mujh se baat jo us dil-rubā ne kī
kis husn se adā use takrār ne kiyā

na the āshiq kisī be-dād par ham jab talak 'tābāñ'
hamāre dil ke ta.iiñ kuchh dard-o-ġham tab tak na thā hargiz

maiñ apne aap ko kis tarah sañgsār karūñ
mire ḳhilāf mirā dil agar gavāhī de

dil merā jalāyā kyā afsos hazār afsos
barbād kiyā ai but allāh kā ghar tū ne

lagā jab yuuñ ki uktāne lagā hai dil ujāloñ se
use mahfil se us kī alvidā.a kah kar nikal aa.e

āñkheñ jhapak ke rah ga.iiñ dil kī vafāt par
sailāb sirf dīda-e-tar ho ke rah ga.e