Tags-Dil

dar dil kā 'suhail' aaj zarā band na karnā
ik shaḳhs abhī lauT ke aane ke liye hai

ye dil bach kar zamāne bhar se chalnā chāhe hai lekin
jab apnī raah chaltā hai akelā hone lagtā hai

jab zarā raat huī aur mah o anjum aa.e
bār-hā dil ne ye mahsūs kiyā tum aa.e

ai mire vāda-shikan ek na aane se tire
dil ko bahkāne ka.ī talḳh tavahhum aa.e

sanam ke kūche meñ chhup ke jaanā agarche yuuñ hai ḳhayāl dil kā
pa vo to jaate hī taaḌ legā phir aanā hogā muhāl dil kā

guhar ne ashkoñ ke yaañ nikal kar jhamak dikhā.ī jo apnī har dam
to ham ne jaanā ki motiyoñ se bharā hai pahlū meñ qaal dil kā

kabhī ishārat kabhī lagāvaT kabhī tabassum kabhī takallum
ye tarzeñ Thahreñ to ham se phir ho bhalā jī kyūñkar sambhāl dil kā

vo zulf-e-pur-pech-o-ḳham hai us kī phañsā to niklegā phir na hargiz
hamārā kahnā hai sach are jī tū kaam us se na Daal dil kā

maiñ lahza lahza huuñ khīñch laatā vo phir usī kī taraf hai jaatā
karūñ 'nazīr' us kī fikr maiñ kyā hai ab to mere ye haal dil kā

ye kis ne jalva hamāre sar-e-mazār kiyā
ki dil se shor uThā haa.e be-qarār kiyā

ye dil ko taab kahāñ hai ki ho ma.āl-andesh
unhoñ ne va.ada kiyā is ne e'tibār kiyā

kahāñ kā sabr ki dam par hai ban ga.ī zālim
ba tañg aa.e to hāl-e-dil āshkār kiyā

taḌap phir ai dil-e-nādāñ ki ġhair kahte haiñ
aḳhīr kuchh na banī sabr iḳhtiyār kiyā

mile jo yaar kī shoḳhī se us kī bechainī
tamām raat dil-e-muztarib ko pyaar kiyā

na us ke dil se miTāyā ki saaf ho jaatā
sabā ne ḳhaak pareshāñ mirā ġhubār kiyā

na pūchh dil kī haqīqat magar ye kahte haiñ
vo be-qarār rahe jis ne be-qarār kiyā

jab un ko tarz-e-sitam aa ga.e to hosh aayā
burā ho dil kā bure vaqt hoshyār kiyā

asīrī dil-e-āshufta rañg lā ke rahī
tamām turra-e-tarrār taar taar kiyā

'siyā' kuchh din se bojhal hai bahut dil
maiñ ro ro kar ke halkī ho ga.ī huuñ

dīdanī haiñ dil-e-ḳharāb ke rañg
aah us chashm-e-pur-hijāb ke rañg