Tags-Dil

dil ko maiñ qaid-e-qafas se to bachā le aayā
kab use qaid-e-nasheman se rihā.ī dūñgā

bayān qissa-e-bechārgī kiyā jaa.e
jo dil kī rah ga.ī dil meñ use kahā jaa.e

sañg-dil samjhā barahman shaiḳh samjhe had mazāq
hañs paḌe donoñ mujhe ab tak musalmāñ dekh kar

shikva farmāte hī ulTī minnateñ karnī paḌīñ
dil pashemāñ ho gayā un ko pashemāñ dekh kar

yuuñ badan meñ ḳhuun ko azm-e-safar kā ho junūñ
dil ke dariyā meñ vo phir paidā bhañvar karne lage

sabza ho yā dil tere qadam se
kaun hai jo pāmāl nahīñ hai

kyā zikr-e-chaman kyā fikr-e-chaman kyā zauq-e-chaman kyā shauq-e-chaman
dāġhoñ se hamārā ḳhāna-e-dil hai daulat-ḳhāna phūloñ kā

ahl-e-tūfāñ soch rahe haiñ sāhil Duubā jaatā hai
ḳhud un kā dil Duub rahā ho ye bhī to ho saktā hai

apne āshiq haiñ apne vārafta
aap hī apne dil-rubā haiñ ham

ishq jo dil meñ dard ho ke rahā
ḳhud usī dard kī davā haiñ ham

rāz-e-dil kī tarah zamāne meñ
the chhupe aaj barmalā haiñ ham

abhī to qaid haiñ jazboñ kī āñdhiyāñ dil meñ
hamārā sabr jo toḌā qayāmateñ hoñgī

hubb-e-qaumī kā zabāñ par in dinoñ afsāna hai
bāda-e-ulfat se pur dil kā mire paimāna hai

uThā hijāb to bas dīn-o-dil diye hī banī
janāb-e-shaiḳh ko da.avā thā pārsā.ī kā

na us kā bhed yaarī se na ayyārī se haath aayā
ḳhudā āgāh hai dil kī ḳhabardārī se haath aayā

na kar zālim dil-āzārī jo ye dil manzūr hai lenā
kisī kā dil jo haath aayā to dildārī se haath aayā

koī ye vahshi-e-ram-dīda tere haath aayā thā
par ai sayyād-vash dil kī giraftārī se haath aayā

dil se jaatī nahīñ Thahre hue qadmoñ kī sadā
aañkh ne svāñg rachā rakkhā hai bīnā.ī kā

ab na vo lams nigāhoñ kā na ḳhushbū kī sadā
dil ne dekhā thā magar ḳhvāb shanāsā.ī kā

unheñ kā zikr hai din raat un kī bāteñ haiñ
tumhārā dil hai ye merā kabhī nahīñ hogā