Tags-Dil

ḳhadañg-e-nāz ne kuchh is tarah kiyā zaḳhmī
jo dil ke zaḳhm haiñ un kā shumār kyā hogā

bure māhaul se guzrā hai ye dil
mohabbat lafz se hī kāñptā hai

laakh ābād-e-tamannā ho ke dil
phir bhī vīrāñ hai na jaane kis liye

muntazir dasht-e-dil-o-jāñ hai ki aahū aa.e
saare manzar hī badal jaa.eñ agar tū aa.e

ḳhudā shāhid buto do-jag se ye saudā hai nirvālā
maiñ do bādām-e-chashm-e-lutf par dil bechne vaalā

vo nā-farmāñ banā ḳhūn-e-jigar se mai na pī uzlat
kabāb-e-dil kī bū aatī hai har pyāle se juuñ laalā

be-nām huuñ be-nañg huuñ zāhir to hai tum par
gar rabt nahīñ dil se bhulā kyuuñ nahīñ dete

zaḳhmoñ ko mire dil pe agar dekh liyā hai
dāman se vafāoñ kī havā kyuuñ nahīñ dete

le ke dil rakh lo kaam aa.egā
go abhī tum ko ehtiyāj nahīñ

dil-e-be-mudda.ā ḳhudā ne diyā
ab kisī shai kī ehtiyāj nahīñ

dil-lagī kījiye raqīboñ se
is tarah kā mirā mizāj nahīñ

yaas ne kyā bujhā diyā dil ko
ki taḌap kaisī iḳhtilāj nahīñ

sabr bhī dil ko 'dāġh' de leñge
abhī kuchh is kī ehtiyāj nahīñ

jis dhuup kī dil meñ ThanDak thī vo dhuup usī ke saath ga.ī
in jaltī baltī galiyoñ meñ ab ḳhaak uḌā.ūñ kis ke liye

ahl-e-dil hasrat-e-dil le ke tumhāre dar par
aaj kis bhes meñ aa.e haiñ tumheñ kyā ma.alūm

'saif' ye dard se ma.amūr ḳharābe dil ke
kitnī mushkil se basā.e haiñ tumheñ kyā ma.alūm

kabhī to chamkegā dil raas aa.egī duniyā
jahāñ se guzrā huuñ ye sochtā huā har baar

miT rahī haiñ dil se yādeñ rozgār-e-aish kī
ab nazar kaahe ko ā.eñgī ye tasvīreñ kahīñ

nazar un kī aise milī hai ki jaise
milā.eñge dil bhī magar rafta rafta

taḌaptī dekhtā huuñ jab koī shai
uThā letā huuñ apnā dil samajh kar