Tags-Dil

vo aisā chhā gayā hai zehn-o-dil par
jidhar dekhūñ usī ko dekhtā huuñ

aa.ī hai tire ishq kī baazī dil-o-jāñ par
is vaqt nazar kab hai mujhe sūd-o-ziyāñ par

kisī dard-mañd kī huuñ sadā kisī dil-jale kī pukār huuñ
jo bigaḌ gayā vo nasīb huuñ jo ujaḌ ga.ī vo bahār huuñ

kahūñ kyā hai kyā mirī zindagī ye hai zindagī koī zindagī
vo hai dushman-e-dil-o-jāñ mirā dil-o-jāñ se jis pe nisār huuñ

kitnā kaalā ho gayā thā us kā dil
jism se niklā to thā ḳhanjar siyāh

dil se ḳhayāl-e-dost bhulāyā na jā.egā
siine meñ daaġh hai ki miTāyā na jā.egā

ai dil razā-e-ġhair hai shart-e-razā-e-dost
zinhār bār-e-ishq uThāyā na jā.egā

har bazm meñ mauzū-e-suḳhan dil-zadagāñ kā
ab kaun hai shīrīñ hai ki lailā hai ki tum ho

vo vaqt na aa.e ki dil-e-zār bhī soche
is shahr meñ tanhā koī ham sā hai ki tum ho

kyuuñ dostoñ kī bhiiḌ se ghabrā na jaa.e dil
dushman to rah ga.e haiñ yahāñ kam bahut hī kam

lab agar ḳhūgare-fuġhāñ hoñge
dāġh-e-dil aur bhī ayaañ hoñge

chhiḌ gayā phir tire shabāb kā zikr
dil ke armān phir javāñ hoñge

vaj.h-e-barbādī-e-dil-e-'rif.at'
aap jaise hī qadr-dāñ hoñge

ghultā hai dil ki rah-rav-e-ulfat ke vāste
maiñ ḳhizr huuñ pa chashma-e-haivāñ se duur huuñ

kahtā hai us kī zulf meñ phañs kar ye murġh-e-dil
qaidī to huuñ 'jamīla' pa zindāñ se duur huuñ

nā-gahāñ magar is meñ phuul kyuuñ nahīñ khilte
reg-zār kī mānind ḳhāk-e-dil bhī taptī hai

shabnam se nahīñ, rañg diyā dil ke lahū se
har ḳhaar ko barg-e-gul-e-tar ham ne banāyā

ye girya-o-zārī dil-e-betāb kahāñ tak
rusvā kahīñ ho jaa.e na taqsīr kisī kī

bhaḌak uThtī hai dil meñ ātish-e-ġham
ḳhayāl aatā hai jab un kī galī kā

lagī dil kī ho alfāz-o-bayāñ meñ
yahī ek ḳhaas fan hai shā.irī kā