Tags-Dil

ek vahshat sī rahī tujh se bichhaḌ kar dil meñ
lab-e-sākit se magar koī bhī shikva na huā

dushman ko bhī de ḳhudā na aulād kā daaġh
jaatā nahīñ hargiz dil-e-nāshād kā daaġh

jab Dūbnā hī tai hai ubharnā muhāl hai
daldal hai dil fareb utar hī na jā.iye

fikr meñ gesū-o-ruḳhsār ke dil kī ḳhātir
shaam hotī hai pareshāñ jo sahar jama.a kareñ

aise ḳhud par yahāñ ḳhudā.ī kī
dil kī dekhī na hī sunā.ī kī

be-qarārī sī dil ko hone lagī
jaane kis ne kahāñ rasā.ī kī

hairāñ huuñ dil kā haal chhupā.ūñ kahāñ kahāñ
sab jaan ga.e baat banā.ūñ kahāñ kahāñ

ik chiiz zaḳhm-e-dil hai dikhā.ūñ kahāñ kahāñ
ik baat soz-e-dil hai sunā.ūñ kahāñ kahāñ

ik dasht-e-lā-hisāb meñ khoyā gayā hai dil
'rahbar' ab us ko DhūñDne jā.ūñ kahāñ kahāñ

kiye haiñ mujh pe jo ehsāñ jatā nahīñ saktā
vo shaḳhs to mirā dil bhī dikhā nahīñ saktā

tumhārī shā.irī kyā hai burā bhalā kyā hai
tum apne dil kī udāsī ko gaane lagte ho

ruk jā hujūm-e-gul ki abhī hausla nahīñ
dil se ḳhayāl-e-tañgī-e-dāmāñ gayā nahīñ

nañge paañv kī aahaT thī yā narm havā kā jhoñkā thā
pichhle pahar ke sannāTe meñ dil dīvāna chauñkā thā

kaisā shikva kaisī shikāyat dil meñ yahī socho 'jāved'
tum hī ga.e the us kī galī meñ vo kab tum tak aayā thā

lamha lamha sāz-e-dil ḳhāmosh sā
ik sadā bas gūñjtī kānoñ meñ hai

āñkheñ bhī maañd thiiñ mirā dil bhī figār thā
haa.e vo shaḳhs jis kā mujhe intizār thā

charāġh dil kā thā raushan bujhā gayā paanī
ki ban ke sail-e-balā ghar meñ aa gayā paanī

nigah ke sāmne us kā jūñhī jamāl huā
vo dil hī jaane hai us dam jo dil kā haal huā

bahār-e-husn vo aa.e nazar jo us kī 'nazīr'
to dil vahīñ chaman-e-ishq meñ nihāl huā

añdherā ho gayā hai shahr bhar meñ
koī dil jalte jalte bujh gayā kyā