Tags-Discrimination

tam.īz-e-lāla-o-gul se hai nāla-e-bulbul
jahāñ meñ vā na koī chashm-e-imtiyāz kare

mirī nigāh meñ vo riñd hī nahīñ saaqī
jo hoshiyārī o mastī meñ imtiyāz kare

pāsbān-e-gulistāñ bante haiñ aur
imtiyāz-e-sho.ala-o-shabnam nahīñ

mujhe piirī aur shabāb meñ jo hai imtiyāz to is qadar
koī jhoñkā bād-e-sahar kā thā mire paas se jo guzar gayā

vo nigāh-e-mast uThī gardish meñ jaam aa hī gayā
yaanī vaqt-e-imtiyāz-e-ḳhās-o-ām aa hī gayā

haañ batā de ham ko bhī ai rūh-e-arbāb-e-niyāz
kis tarah miTtā hai āḳhir rang-o-ḳhūñ kā imtiyāz

tere jalvoñ ne miTāyā imtiyāz-e-roz-o-shab
dekhtā huuñ māh-e-nau bhī mehr-e-ālam-tāb bhī

saudā-e-ishq zulf-e-siyah jis ke sar meñ hai
kab mutlaq imtiyāz use nafā o zarar meñ hai

ham kis shumār meñ the pursish jo ham se hotī
ye imtiyāz paayā āshob-e-āgahī meñ

biinā hai gar to ḳhaak Daal dīda-e-imtiyāz meñ
jaam o ḳhum-o-subū na dekh mai-kada-e-majāz meñ

apnī ḳhabar kahāñ unheñ jin pe khulā hai rāz-e-ishq
saare shu.ūr miT ga.e jab huā imtiyāz-e-ishq

dair milā thā raah meñ ka.abe ko ham nikal ga.e
jazba-e-shauq meñ dimāġh kis ko ho imtiyāz kā

qafas meñ rah ke mujhe ye bhī imtiyāz nahīñ
kise ḳhizāñ kise fasl-e-bahār kahte haiñ

imtiyāz-e-jalva-o-parda jahāñ rahtā nahīñ
vo maqām aa.e to zauq-e-dīd ko kāmil samajh

ḳhusrav-e-aish-e-vasl-e-yār jāñ-kanī aur kohkan
apnā jigar to ḳhuuñ huā ishq ke imtiyāz meñ

jab tak haqīqatoñ se mirā dil thā be-ḳhabar
bechāra mubtalā-e-ġham-e-imtiyāz thā

aa.ī nigār-e-ġham kī sadā 'hosh' ham chale
tum imtiyāz-e-sūd-o-ziyāñ dekhte raho

ho jaa.e un ko apne parā.e meñ imtiyāz
yārab unheñ bhī chashm-e-haqīqat-nigar mile

kuchh imtiyāz-e-maz.hab-o-millat nahīñ hameñ
ik mo'tabar rafīq-e-safar DhūñDte haiñ ham