Tags-Aangan

mo.ajiza ishq kā ye bhī hai zamāne vaalo
mere āñgan meñ hue phuul tumhāre patthar

maiñ apne āñgan kī zard miTTī pe baiThā pahroñ ye sochtā huuñ
dabīz shīshe kī khiḌkiyoñ meñ ugī thī shāḳh-e-anār kaise

chhiTkī huī thī chāñdnī yādoñ kī shab ko 'rāz'
āñgan mire ḳhayāl kā thā chauñktā huā

maiñ lauT aayā dabe paañv ghar ke āñgan se
makān ġhair kā darvāza apne ghar kā thā

merī rātoñ ke siyah āñgan meñ
chāñd koī kabhī chamkā hī nahīñ

kabhī bādal mere āñgan utartā pūchhtā maiñ bhī
kuhistāñ par barasnā kis ne terā kaam rakkhā hai

kahā is ghar ke āñgan meñ haiñ kuchh phūloñ ke paude bhī
javāb aayā ki ḳhālī phir bhī har gul-dān rahtā hai

phūl, paude, peḌ, bachche ghar kā āñgan aur tum
ḳhvāhishoñ ke naam par in sab ko yakjā kar diyā

hamāre ghar ke āñgan meñ sitāre bujh ga.e lākhoñ
hamārī ḳhvāb gāhoñ meñ na chamkā sub.h kā sūraj

kachche āñgan kā vo ghar vo bām-o-dar
gaañv kī pagDañDiyāñ vo rahguzar

chhāñv bhī dūñgā davāoñ ke bhī kaam ā.ūñgā
niim kā paudā huuñ āñgan meñ lagā lo mujh ko

darvāze par muñh laTkā.e qillat rañg-o-roġhan kī
āñgan āñgan jashn manā.e ḳhvāhish niilī piilī sī

shaam kaisī mire āñgan meñ utar aa.ī hai
yaad hai dil meñ tirī ālam-e-tanhā.ī hai

na khiḌkī hai na āñgan hai na roshan-dān hai koī
imārat-sāz ye naqsha mujhe achchhā nahīñ lagtā

mahfiloñ meñ ham rafīq-e-rāz-dāñ samjhe ga.e
ghar ke āñgan meñ magar tanhā.iyāñ bote rahe

ik dhuāñ uTh rahā hai āñgan se
haiñ abhī kuchh charāġh raushan se

sunahrī yādeñ hī paltī rahīñ jis āñgan meñ
maiñ us mahal ke dar-o-bām honā chāhtā huuñ

jis ke āñgan se khule the mire saare raste
us havelī pe bhalā kaise maiñ taalā dekhūñ

shor itnā huā āñgan meñ ki phir bhuul gayā
aaj barsoñ meñ use yaad kiyā thā maiñ ne

ye mere jīvan ke saare mausam batā rahe haiñ
maiñ apne āñgan ke har shajar kī javānī likkhūñ