Tags-Aangan

apne gharoñ ke kar diye āñgan lahū lahū
har shaḳhs mere shahr kā qābīl ho gayā

raat ke saa.e meñ ik ujḌe hue āñgan meñ
be-sadā ThūñTH ke mānind khaḌā hai koī

āñgan meñ paanī aayā hai
kyā achchhā tālāb banā hai

merī turbat ke to āñgan meñ na Thahrā ik dam
ye tire jī meñ na aayā shab-e-mahtāb hai yaañ

kis kā rasta dekh rahe haiñ ghar ke kivāḌ
suunā suunā āñgan kise bulātā hai

pañkh hilā kar shaam ga.ī hai is āñgan se
ab utregī raat anokhī yādoñ vaalī

mujh ko chhū mere shab-o-roz ko raushan kar de
mere āñgan meñ bhī pal bhar ko Thahar ab ke baras

kamre ḳhālī ho ga.e sāyoñ se āñgan bhar gayā
Dūbte sūraj kī kirneñ jab paḌīñ dālān par

āñgan meñ tere phuul rahī hogī kāmanī!
jī chāhtā hai aaj baserā vahīñ kareñ

shaam bojhal sī
ghane peḌ se āñgan meñ utar aa.ī hai

mere ghar ke āñgan meñ
koī shaam suhānī rakh

sitam kī lahr chalī aa mujhe gale se lagā
mire vajūd ke āñgan meñ sochtī kyā hai

bujhne lagī hai shaam ke āñgan meñ raushnī
ab mauj-e-ḳhūn-e-dil hī koī mo.ajiza kare

mausamoñ ke ġhazab se bachāte hue, apnī bāhoñ kā halqa banāte hue
dukh uThā.e jahāñ merī maañ ne bahut, apne āñgan kā paudā shajar kar liyā

āñgan meñ lahū dekh ke rotī nahīñ āñkheñ
ye dil to sulagtā hai pa jalne nahīñ detā

chādar to sarkāo sar se
āñgan meñ bikhrā hai sonā

kis hinā-hāth se āñgan hai mo.attar itnā
vaqt-e-ḳhush sā.at-e-bedār kahāñ se aa.ī

gaurayyoñ ne jashn manāyā mere āñgan bārish kā
baiThe baiThe aa ga.ī niiñd isrār thā ye kisī ḳhvāhish kā

shab ko bhī ruuh ke āñgan meñ rahī dhuup 'qatīl'
chāñd tāroñ ne bhī aa kar na bujhāyā sūraj

sar-e-dīvār ye kyuuñ nirḳh kī takrār huī
ghar kā āñgan kabhī bāzār nahīñ ho saktā