Tags-Aangan

ai paiham-parvāz parinde dam le le
nahīñ utartā āñgan meñ to chhat par aa

vahī aa ke birāje āñgan meñ vahī saaje naddī ke taT par
vahī bhaiñseñ charā.e bailoñ meñ vahī charvāhā vahī kaamā

sāñjh hue jab āñgan jāgne lagte haiñ
dil meñ yaad ke diye jalānā achchhā hai

āñgan āñgan ḳhuun ke chhīñTe chehra chehra be-chehra
kis kis ghar kā zikr karūñ meñ kis kis ke sadmāt likhūñ

band darīchoñ ke kamre se purvā yuuñ Takrā.ī hai
jaise dil ke āñgan meñ dukhiyā ne taan lagā.ī hai

tū kisī sub.h sī āñgan meñ utar aatī hai
maiñ kisī dhuup sā dālān meñ aa jaatā huuñ

yūñhī ḳhushbū se mo.attar nahīñ sāñseñ merī
zulf lahrā.ī hai āñgan meñ kisī pyārī ne

ghar se hamārī āñkh-mīcholī rahī sadā
āñgan nahīñ milā to kabhī dar nahīñ milā

phir uThā yaad ke āñgan se udāsī kā dhuāñ
kis ne tāqoñ meñ jalā kar mirī shāmeñ rakh diiñ

ishq meñ āñgan darīche DhūñDhnā mat 'shāziya'
aa ga.ī hai jail meñ nādān rahne ke liye

mere āñgan tū nahīñ utrā
sab ne iid manā lī chāñd

havelī dil kī hai 'armān' suunī suunī sī
udaas ruuh kā āñgan hai kyā kiyā jaa.e

jo bachche ho ga.e qābil uḌe vo panchhī se
ki suunā suunā sā āñgan hai kyā kiyā jaa.e

mujhī se pūchh rahā hai ye merā ham-sāya
tumhārā ghar mirā āñgan hai kyā kiyā jaa.e

us ko sāyoñ ke ta.āqub meñ likhā thā rahnā
dard āñgan meñ ghanā ek shajar chāhtā thā

dil ke āñgan meñ ba-sad naaz thā vo mahv-e-ḳhirām
phuul hī phuul thā naqsh-e-kaf-e-pā āḳhir-e-shab

ik shajar aisā mohabbat kā lagāyā jaa.e
jis kā ham-sā.e ke āñgan meñ bhī saayā jaa.e

udāsī ke āñgan meñ terī talab kī
ajab ḳhushnumā ik kalī khil rahī hai

ek nannhī parī hai āñgan meñ
jo mire ghar ko ghar banātī hai

tamannā āsmānoñ ke safar kī
magar āñgan ki bas chhoḌā na jaa.e