Tags-Diwangi

aisī mantiq se to dīvāngī behtar 'akbar'
ki jo ḳhāliq kī taraf dil ko jhukā hī na sake

kuchh maḳhmasāt-e-dahr the dīvāngī se kam
achchhā huā ki ishq meñ dīvāna ho gayā

rubā vo dīvāngī de mujhe
rachā.ūñ vo tāñDo

mirī talāsh tirī dilkashī rahe baaqī
ḳhudā kare ki ye dīvāngī rahe baaqī

mirī dīvāngī thī ik sharār-e-ārzū dil meñ
baḌhī to daar par raushan huī sham-e-yaqīñ ban kar

dasht-e-najd-e-yās meñ dīvāngī ho har taraf
har taraf mahmil kā shak ho par kahīñ mahmil na ho

ain dānā.ī hai 'nāsiḳh' ishq meñ dīvāngī
aap saudā.ī haiñ jo kahte haiñ saudā.ī mujhe

dīvāngī merī ke tahayyur meñ shab-o-roz
hai halqa-e-zanjīr se zindāñ hama-tan-chashm

mujh meñ ye intishār ye nafrat hai kis liye
guzre hue samāj kī dīvāngī se pūchh

tamām umr kī dīvāngī ke ba.ad khulā
maiñ terī zaat meñ pinhāñ thā aur tū maiñ thā

dīvāngī meñ pheñk rahe the jo ham libās
utrī qabā buḳhār badan se utar gayā

hai mausam-e-dīvāngī phir chaak ījād mirī
lauTā rahe haiñ pahle kā ḳhayyāt kaam aayā huā

vo mohabbat bhī kyā mohabbat hai
jis meñ dīvāngī nahīñ hotī

kabhī niiñd aa ga.ī dīvāngī ko
kabhī sahrā bhī thak kar so gayā hai

bāñkpan un kā mash.hūr thā merī dīvāngī par hamesha hañse
lekin āñkhoñ se aañsū chhalakne lage sāmne jab hamārā mazār aa gayā

nisār-e-sham.a hone bazm meñ parvāna aa pahuñchā
qarīb-e-manzil-e-dīvangī dīvāna aa pahuñchā

ḳhāmoshiyāñ ajiib haiñ is sard shahr kī
barfīlī is havā meñ hai dīvāngī abhī

dīvāngī ne kyā kyā aalam dikhā diye haiñ
pariyoñ ne khiḌkiyoñ ke parde uThā diye haiñ

ba-juz dīvāngī vaañ aur chāra hī kaho kyā hai
jahāñ aql o ḳhirad kī ek bhī maanī nahīñ jaatī

merī dīvāngī bharosa rakh
maiñ ne paanī ko bhī ġhubār kiyā