Tags-Dost

sar jhukā.e hue ḳhāmosh jo tum baiThe ho
itnā kaafī hai mire dost nadāmat ke liye

pūchhī hai dost ban ke mire dil kī aarzū
us ne zabān de ke mirā mudda.ā liyā

mehmān dost ko jo kiyā dostoñ ke saath
dekhā thā jis ko dīda-varoñ ko dikhā liyā

vo merā dost thā ab dushman-e-jāñ ban gayā hai jab
maiñ us ko dekh kar apnā nishāna bhuul jaatā huuñ

justujū ne dost āḳhir justujū-e-dost hai
rahrav-e-rāh-e-talab gum-karda-e-manzil sahī

abhī tak us kā tasavvur to mere bas meñ hai
vo dost hai to ḳhudā kis liye banā.ūñ use

jaan de dī maiñ ne tañg aa kar vufūr-e-dard se
aaj manshā-e-jafā-e-dost puurā ho gayā

madd-e-nazar rahī hameñ aisī razā-e-dost
kaaTī zabāñ jo shikva dahan se nikal gayā

zid har ik baat par nahīñ achchhī
dost kī dost maan lete haiñ

ai dost talattuf siiñ mire haal kuuñ aa dekh
siine kī agan mehr ke paanī siiñ bujhā dekh

roke jaate haiñ rah-e-dost ke chalne vaale
vahī dushman hai jo hamdard hai dīvāne kā

dīda-e-dost tirī chasm-numā.ī kī qasam
maiñ to samjhā thā ki dar khul gayā maiḳhāne kā

hasb-e-farmā.ish-e-gardish haiñ ġharīboñ ke mazār
āsmāñ dost hai manzar mire vīrāne kā

mere hamrāz mire dost mire saath na chal
lamha lamha tujhe āvāz kī Thokar degā

yuuñ to rahe ho tum bhī saf-e-dushmanāñ meñ dost
lekin tumheñ shumār nahīñ kar rahā huuñ maiñ

kahāñ tamām huī dāstān 'bismil' kī
bahut sī baat to kahne ko rah ga.ī ai dost

bantī nahīñ dil se 'shāz' apnī ye dost hai yā dushman koī
ham haiñ ki musalsal hañste haiñ vo hai ki musalsal rotā hai

visāl-e-dost se bhī kam na ho sakī 'rāshid'
azal se paa.ī huī tishnagī ko kyā kiije

hamāre hisse kā ik jur.a bhī nahīñ baaqī
nigāh-e-dost kī mai-ḳhāngī ko kyā kiije

yuuñ bhī tirā ehsān hai aane ke liye aa
ai dost kisī roz na jaane ke liye aa