Tags-Dost

hai tarz-e-guftugū bhī vahī dost bhī vahī
dushman to merī jaan kā merā bharam huā

vaqt ne ye kahā hai ruk ruk kar
aaj ke dost kal ke begāne

nairañg husn-e-dost se kar āñkheñ āshnā
mumkin nahīñ vagarna ho dīdār ek tarah

ye kahāñ kī dostī hai ki bane haiñ dost nāseh
koī chārasāz hotā koī ġham-gusār hotā

us par bhī dushmanoñ kā kahīñ saaya paḌ gayā
ġham sā purānā dost bhī āḳhir bichhaḌ gayā

ma.azarat chāhtā huuñ dost
maiñ ab intizār nahīñ kartā

vo dost saare the chaar pal ke jo chal diye ham-safar badal ke
'sahāb'-e-nādāñ vahīñ khaḌā hai usī Dagar par Thahar gayā vo

DhūñDhne par bhī na miltā thā mujhe apnā vajūd
maiñ talāsh-e-dost meñ yuuñ be-nishāñ thā dosto

aql kahtī hai dobāra āzmānā jahl hai
dil ye kahtā hai fareb-e-dost khāte jā.iye

dil nahīñ gurg-e-baġhal hai zabt se ḳhuuñ kar use
kār-e-dushman karte haiñ ai dost dānā.ī ke saath

vo merā dost hai aur mujh se vāsta bhī nahīñ
jo qurbateñ bhī nahīñ haiñ to fāslā bhī nahīñ

apnā shāyad yahī thā jurm ai dost
bā-vafā ban ke be-vafā na bane

zamāna merī tabāhī pe jo udaas huā
maiñ apne aap se ai dost rū-shanās huā

tū saath kahāñ lekin ab tak har rahguzar-e-tanhā.ī par
jo aage aage chaltā hai ai dost koī tujh sā hī to hai

aate rahne ke liye shukriya ai yaad ki dost
maiñ hī mujrim huuñ tirī yaad meñ aayā na kabhī

'sho.ala' muhāl hai ki baḌhe dil kī raushnī
jab tak ḳhayāl-e-dost na paidā kare koī

ye chaar din kī rifāqat bhī kam nahīñ ai dost
tamām umr bhalā kaun saath detā hai

ghar kī buniyād meñ ārām nahīñ kartī hai
ai mire dost ye Tīloñ se uThā.ī huī ret