Tags-Dost

ḳhayāl-e-dost na hasrat na aarzū na ummīd
ye dil hai ab kisī ujḌe hue chaman kī tarah

vo tere lutf-e-tabassum kī naġhmagī ai dost
ki jaise qaus-e-quzah par sitār bajtā hai

ham apne hī ghar meñ rahte the jab terī nazar meñ rahte the
ab roz satātī hai ham ko ai dost vatan meñ be-vatanī

farz thā ehtirām-e-dost tak magar na ruk sake
baat laboñ tak aa ga.ī pās-e-adab ke ba.ad bhī

kyā ġhazab hai ki dost tū samjhe
dushmanoñ kī ri.āyatoñ se mujhe

aañkh uThā kar jab bhī dekhūñ peḌoñ ko
mujh ko mere dost purāne lagte haiñ

safar hayāt kā pur-lutf hai magar ai dost
musībateñ bhī usī rahguzar meñ rahtī haiñ

qadam qadam vo mire saath aur maiñ tanhā
mile haiñ dost mire mujh se āsmāñ kī tarah

ajnabī mujh se aa gale mil le
aaj ik dost yaad aa.e mujhe

ye dost barsar-e-paikār hone lag ga.e haiñ
to vaj.h banñe lagī hai fasād nafrat kī

baiTh jaa.eñ kisī goshe meñ simaT kar ai dost
kaun gardish meñ rahe shams-o-qamar kī sūrat

majrūh to kar saktā nahīñ tere yaqīñ ko
ai dost magar fitrat-e-hamrāz hai mujh meñ

sitam-dost fikr-e-adāvat kahāñ tak
kahāñ tak vafā se baġhāvat kahāñ tak

merī palkeñ bhī girāñ-bār rahī haiñ ai dost
ab ye aañsū tire dāman pe girāñ aur sahī

umr-bhar is liye barseñ mirī āñkheñ ai dost
ek sahrā mirī jāgīr meñ rakkhā gayā thā

aatī nahīñ hai niiñd mujhe is liye bhī dost
āñkhoñ kī putliyoñ meñ hazāroñ jhaḌe haiñ ḳhvāb

itnī āsāñ bhī ġham-e-dost kī takmīl nahīñ
ghar bhī ujḌe to bayābāñ nahīñ hone paatā

shoḳhī shabāb husn tabassum hayā ke saath
dil le liyā hai aap ne kis kis adā ke saath

jalā.e dost yā ThanDā kare dil jo razā us kī
na dozaḳh se mujhe nafrat na maiñ mushtāq jannat kā

dostī kī tum ne dushman se ajab tum dost ho
maiñ tumhārī dostī meñ mehrbāñ maarā gayā