Tags-Dost

pahuñch to saktā thā manzil pe maiñ magar ai dost
maiñ dūsroñ ke liye rāsta banā huā huuñ

kab lauTā hai bahtā paanī bichhḌā sājan rūThā dost
ham ne us ko apnā jaanā jab tak haath meñ dāmāñ thā

kuchh aisī iltifāt-numā thī nigāh-e-dost
hote rahe tabāh shikāyat na kar sake

dost ke shahr meñ jab maiñ pahuñchā shahr kā manzar achchhā thā
la.al-o-gohar se bhī us kī dahlīz kā patthar achchhā thā

maiñ faizyāb-e-gardish-e-sāġhar nahīñ huā
kyuuñ ai nigāh-e-dost ye kyūñ-kar nahīñ huā

mahkī rāteñ dost havā.eñ pichhlī shab kā chāñd
rah ga.e sab ḳhush-ḳhvāb nazāre dariyā ke us paar

kyā ajab daur-e-pur-āshob hai jis meñ ai dost
log dastār bachāte haiñ to sar jaate haiñ

haañ yahī ḳhāk-basar soḳhta-sāmāñ ai dost
tere qadmoñ meñ sitāroñ ko jhukā dete haiñ

kyā karūñ koī nahīñ ehtiyāj dost ko
aur mujh ko dost kī ehtiyāj kyā karūñ

tirī nigāh-e-karam hai vagarna ai ġham-e-dost
zamāna kyā tire shaidā.iyoñ se ḳhālī hai

jāda-e-zīst pe barpā hai tamāshā kaisā
dost bichhḌā hai har ik gaam pe kaisā kaisā

dil hai ā.īna-e-do-rū apnā
dost dushman se ek sā huuñ maiñ

juz tire koī bhī din raat na jaane mere
tū kahāñ hai magar ai dost purāne mere

ḳhush-hāl ghar sharīf tabī.at sabhī kā dost
vo shaḳhs thā ziyāda magar aadmī thā kam

pātāl ke dukh vo kyā jāneñ jo sat.h pe haiñ milne vaale
haiñ ek havāla dost mire aur ek havāla ghar meñ hai

vo hī hamārā tarīq-e-ulfat ki dushmanoñ se bhī mil ke chalnā
ye ek sheva tirā sitamgar ki dost se dostī na karnā

daad jab madd-e-muqābil ke suḳhan kī dī aaj
dost kahte haiñ ki matlab kī taraf-dārī hai

ik zarā haal to dekho mirā ai dost mire
tum hī socho koī aise meñ ḳhafā hotā hai

rū-e-gul ho chehra-e-mahtāb ho yā husn-e-dost
har chamaktī chiiz ko kuchh duur se dekhā kareñ

vaqt ne ye kahā hai ruk ruk kar
aaj ke dost kal ke begāne