Tags-Dost

vo dost hai aur burā nahīñ hai
bas mere mizāj kā nahīñ hai

ye rañj apnī asl shakl meñ hai dost
ki maiñ ise sañvār bhī nahīñ rahā

yahāñ to dekh liye ham ne hausle sab ke
mile na dost na dushman hī apne mansab ke

ye kam to nahīñ tū mirā meyār-e-nazar hai
ai dost mire vāste kuchh aur na ban tū

bharosā charḳh par ai dil na karnā
huā kab dost ye pur-fan kisī kā

chalo 'arsh' mahfil-e-dost meñ ki payām-e-dost bhī hai yahī
vo jo hādisa thā firāq kā sar-e-dushmanāñ se guzar gayā

dushman-e-jāñ ko dost samjhā maiñ
vo kahāñ maiñ kahāñ qayās kahāñ

hameñ yahī hai munāsib ki ek sū ho leñ
jagah miyān-e-vajūd-o-adam nahīñ ai dost

khulā hai aur khulegā 'jamīl' sab ke liye
ye mai-kada hai kunisht-o-haram nahīñ ai dost

ajab mizāj hai in mai-kada nashīnoñ kā
ki qadr-e-jām to hai qadr-e-jam nahīñ ai dost

agarche sard añdhere haiñ bā.is-e-taklīf
magar ye garm ujāle bhī kam nahīñ ai dost

ḳhushāmadoñ se nikaltā nahīñ hai kaam yahāñ
mo.āmla hai ḳhudā se sanam nahīñ ai dost

koī savāl-e-ḳhudā-o-sanam nahīñ ai dost
maiñ kyā karūñ mirī gardan meñ ḳham nahīñ ai dost

nigāh-e-dost salāmat ki faiz-e-girya se
bahut guhar haiñ mire dāman-e-tahī ke liye

bazm-e-azā-e-dost meñ ġham na sahī tarab sahī
hañs na sako jo khul ke tum to ḳhanda-e-zer-e-lab sahī

nahīñ hai shikva koī dushmanoñ se ai 'barqī'
fareb dost se khāyā to aañkh bhar aa.ī

kuchh to jiine ke liye ham ko bhī de rabb-e-karīm
sāġhar-o-mīnā kisī ġham kā sahārā koī dost

kaise jī pā.eñge is shahr-e-pareshāñ meñ jahāñ
koī dushman hai hamārā na hamārā koī dost

jiit par ḳhush ho tujhe is se ġharaz kyā mire yaar
terī ḳhushiyoñ ke liye jaan se haarā koī dost