Tags-Dost

vahshatoñ par mirī hairān na ho dost mujhe
raqs karte hue sahrā meñ utarnā hai abhī

har dost hai mere ḳhuuñ kā pyāsā
har dost raqīb ho gayā hai

ab mirī fat.h ke āsār numāyāñ haiñ bahut
ab sabhī dost mire mil ga.e aġhyār ke saath

ai ġham-e-dost tere hote hue
ġham-e-lail-o-nahār kaun kare

dost bhī mere achchhe achchhe haiñ
ik muḳhālif bahut pasand aayā

dil hī kī ḳhudā.ī hai yahāñ aaj bhī ai dost
pāband-e-nazar kaif kī duniyā to nahīñ hai

din ek sitam ek sitam raat karo ho
vo dost ho dushman ko bhī tum maat karo ho

tū ne ik baar haqārat se jo dekhā ai dost
maiñ zamāne kī nigāhoñ se utar jā.ūñgā

daraḳht! mere dost
tum mil jaate ho kisī na kisī moḌ par

ghuTe ghuTe se ka.ī dost bhī to rahne haiñ
ye soch kar hī khulī āstīñ banā.ī ga.ī

jām-e-jam the jo mire dost kabhī
hādsa hai ki ḳhabar lagte haiñ

be-kaif masarrat bhī musībat sī lage hai
ai dost mujhe ġham kī zarūrat sī lage hai

ai dost mohabbat kī nazākat hai nazar meñ
ham tujh ko kisī taur pashīmāñ na kareñge

sharāb-e-ishq na ai dost pījiyo hargiz
isī nashe kā ham ab tak ḳhumār rakhte haiñ

abhī na-jāne hameñ kitne dost khone paḌeñ
hamārī bātoñ meñ be-sāḳhtagī agar hai yahī

laakh kar jaur-o-sitam laakh kar ehsān-o-karam
tujh pe ai dost vahī vahm-o-gumāñ hai ki jo thā

jo bhī kar jaur-o-sitam jo bhī kar ehsān-o-karam
tujh pe ai dost vahī vahm-o-gumāñ hai ki jo thā

ye aaj kaun sī taqsīr ho ga.ī 'nāmī'
ki dost bhī to milāte nahīñ nazar ham se

fareb-e-dost na khāte to aur kyā karte
yahī to rasm chalī aa rahī hai aadam se

ham ko har moḌ par dost milte rahe ham kabhī rāh-e-manzil meñ tanhā na the
kal ġham-e-dost thā ab ġham-e-zīst hai āshnā ko to ik āshnā chāhiye