Tags-Dost

thā jis meñ zindagī kā gumāñ vo to jā chukī
ye zindagī hai us ke qadam kā ġhubār dost

dost ahbāb se hañs bol ke kaT jā.egī raat
rind-e-āzād haiñ ham ko shab-e-furqat kaisī

ik tamannā kā huā ḳhuun to kyā ġham ai dost
dafn haiñ siine meñ armān na jaane kitne

tere jalvoñ ne mujhe gher liyā hai ai dost
ab to tanhā.ī ke lamhe bhī hasīñ hote haiñ

barq-e-jamāl-e-dost na ho is pe shola zan
terā bhī ghar hai sirf mirā āshiyāñ nahīñ

sahrā-e-ġham-e-jāñ meñ bagūloñ se bachā kaun
miT jā.eñge ai dost tire naqsh-e-qadam bhī

un se baḌh-chaḌh ke to ai dost haiñ yādeñ in kī
nāz-o-andāz-o-adā meñ tirī rakkhā kyā hai

dil tirā jaan tirī aah tirī ashk tire
jo hai ai dost vo terā hai hamārā kyā hai

kyā ḳhabar thī kī tire shahr se pahle ai dost
raat aa jā.egī aur raah meñ dariyā hogā

shamīm-e-dost baḌhātī hai zindagī lekin
hameñ haqīqat-e-hastī abhī kahāñ mālūm

ai dost farāmosh ye hai haal hamārā
āmīn kahā karte haiñ dushman kī duā par

jo na aap us pe hue ayaañ ye rakhegā ham ko bhī sar-girāñ
ka.ī baar le ke shikāyateñ mire dost arz o samā ga.e

ye zindagī hī talavvun-mizāj hai ai dost
tamām tark-e-vafā terī be-ruḳhī bhī nahīñ

dayār-e-jāñ meñ baḌī der meñ ye baat khulī
mirā vajūd hī ḳhud nañg dost-dārī thā

ek din pūchhā na 'hātim' ko kabhū us ne ki dost
kab se tū bīmār hai aur kyā tujhe āzār hai

iz.hār-e-ishq us se na karnā thā 'sheftā'
ye kyā kiyā ki dost ko dushman banā diyā

ye ek hī ehsān-e-ġham dost hai kyā kam
be-mehri-e-daurāñ kī jafā yaad nahīñ hai

hamārī dostī ai dost shak kī zad meñ hai
haiñ qurbateñ bhī bahut ham meñ dūriyāñ bhī bahut

jab tak mizāj-e-dost meñ kuchh barhamī rahī
goyā bujhī bujhī sī mirī zindagī rahī

ġhazab kā husn sahī terī sādgī meñ magar
pasand haiñ mujhe ai dost shoḳhiyāñ bhī bahut