Tags-Dost

jiine detī hai kise pyaar kī sūrat kāfir
dost to dost hai dushman bhī fidā hotā hai

ek bhī ham ne na dekhā dost 'hātim' ba.ad-e-marg
hai takalluf-bar-taraf kū yaar aur kū āshnā

vo terā dost jo phūloñ ko pathrāne kā aadī thā
kuchh us se sho.abda-bāzī meñ kam tū bhī nahīñ niklā

dushmanī baḌhne kā yuuñ 'nāyāb' ġham ham ko nahīñ
haañ magar afsos ye hai dost kuchh kam ho ga.e

mujh ko ma.alūm nahīñ thā ai dost
tū bhī begāna hai duniyā kī tarah

dostī kyā hai faqat dost samajh saktā hai
jis ne matlab se kiyā yaad nahīñ samjhegā

avval avval thiiñ rāheñ baḌī pur-ḳhatar kaun thā juz ġham-e-dil sharīk-e-safar
phir jo paḌne lagī manziloñ par nazar dost dushman sabhī yaar bante ga.e

tamām dost samundar ke paar jaane lage
par ek dil ko to sāhil pe dhar liyā maiñ ne

dost se maan 'tāj' vo hastī
jis maiñ kuchh farq mā-o-tū na rahe

mausam to badalte haiñ lekin kyā garm havā kyā sard havā
ai dost hamāre āñgan meñ rahtī hai hamesha zard havā

samjhe the ham jo dost tujhe ai miyāñ ġhalat
terā nahīñ hai jurm hamārā gumāñ ġhalat

jahāñ meñ hone ko ai dost yuuñ to sab hogā
tire laboñ pe mire lab hoñ aisā kab hogā

zamāna dost hai kis kis ko yaad rakkhoge
ḳhudā kare ki tumheñ mujh se dushmanī ho jaa.e

gul-kārī-e-nazar ho ki rañg-e-jamāl-e-dost
kuchh baat thī ki ziist jahannam na ho sakī

kitne rumūz-e-shauq in āñkhoñ meñ rah ga.e
jin se nigāh-e-dost bhī mahram na ho sakī

badle bahār-e-lāla-o-gul ne hazār rañg
lekin jamāl-e-dost kā aalam na ho sakī

ḳhudā dushmanoñ ko na vo kuchh dikhā.e
jo kuchh dost se apne ham dekhte haiñ

mohabbat se jo pesh aa.e koī ho dost yā dushman
hameñ to har kisī kā banda-e-be-dām ho jaanā

mohazzab dost āḳhir ham se barham kyuuñ nahīñ hoñge
sag-e-iz.hār ko ham bhī to khullā chhoḌ dete haiñ

tamām ho ga.ī mujh par kisī kī hujjat dost
jahāñ nahīñ thā bipharnā biphar liyā maiñ ne