Tags-Dost

bahut ḳhulūs 'munavār' ke dil meñ paatā huuñ
ajiib shaḳhs hai ye dost mohtaram apnā

mahfil meñ sabhī dost nahīñ aate haiñ
dushman bhī koī dost-numā aa.egā

mere lahje ne mire qad ko kiyā itnā buland
ab to har dost kī ḳhvāhish hai ki dhakkā de de

kise dost apnā banā.eñ ham kise dil kā haal sunā.eñ ham
sabhī ġhair haiñ sabhī ajnabī tire gaañv meñ mire shahr meñ

vaqt-e-ruḳhsat tirī āñkhoñ kā vo jhuk sā jaanā
ik musāfir ke liye zād-e-safar hai ai dost

abhī na raat ke gesū khule na dil mahkā
kaho nasīm-e-sahar se Thahar Thahar ke chale

dast-e-duā ko kāsa-e-sā.il samajhte ho
tum dost ho to kyuuñ nahīñ mushkil samajhte ho

mujh ko izn-e-mafāriqat hai dost
phir na shāyad milūñ ḳhudā-hāfiz

sham-e-zarrīñ kī narm lau ai dost
jab añdhere meñ jagmagātī hai

ziist mushkil sahī magar ai dost
maut āsān rahguzar na samajh

rāz-e-tauhīd to kasrat meñ chhupā hai ai dost
saikḌoñ jalve haiñ ik jalva-numā hai ai dost

tū ne kis aisī nigāhoñ se azal meñ dekhā
aaj tak ḳhauf se dil kaañp rahā hai ai dost

tāj-e-ḳhusrav se ġharaz us ko na taḳht-e-jam se
'afqar'-e-ḳhāk-nashīñ terā gadā hai ai dost

kyā kareñ jaan na de deñ jo mohabbat vaale
har adā husn kī paiġhām-e-qazā hai ai dost

ġham tire jalvoñ meñ ho jaatī haiñ nazreñ un kī
dekhne vāloñ se tere ye sunā hai ai dost

surma-e-tūr ho yā ḳhāk-e-shifā yā iksīr
sab se baḌh kar tirī ḳhāk-e-kaf-e-pā hai ai dost

us zamīñ par kiyā karte haiñ farishte sajde
tere kushtoñ kā jahāñ ḳhuun bahā hai ai dost

ishrat-e-hāsil-e-isyāñ meñ kahāñ vo lazzat
ba-ḳhudā tark-e-gunah meñ jo mazā hai ai dost

jāntā kaun nahīñ ahd-e-vafā ko tere
vo bhī minjumla-e-andāz-e-jafā hai ai dost

ik zamāna yahāñ dīvāna banā hai ai dost
tere kūche kī havā hosh-rubā hai ai dost