Tags-Dost

koī ik shoḳh ishāra hī bahut thā ai dost
itne sanjīda tabassum kī zarūrat kyā thī

tū mil gayā hai to achchhā huā vagarna dost
kise ġharaz thī mohabbat meñ kāmrānī se

pahchānte nahīñ use mahfil meñ dost bhī
chehra ho jis kā gard-e-alam se aTā huā

ai dost chashm-e-shauq ne dekhā hai bār-hā
bijlī se terā naam ghaTā par likhā huā

ai dost dūsroñ kā sahārā to maut hai
ḳhud-dār kab pale haiñ sahāroñ kī god meñ

huuñ vo ġham-dost ki sab apne hī dil meñ bhartā
ġham-e-ālam kī agar is meñ samā.ī hotī

us se baḌh kar dost koī dūsrā hotā nahīñ
sab judā ho jaa.eñ lekin ġham judā hotā nahīñ

thā maiñ sharāb-dost bahut, merī ḳhaak ke
kaase banāne chāhiyeñ kuchh, kuchh subū kareñ

zamāna dostī par in hasīnoñ kī na itrā.e
ye ālam-dost aksar dushman-e-ālam bhī hote haiñ

hamesha yaad hamīñ tak rahe hamāre ġham
vo dost kyā jo kisī ham-navā ko le Duube

pās-e-razā-e-dost ko ahl-e-vafā se pūchhiye
kuchh na zabāñ se kah sake un kā ishāra pā ke bhī

mujhe barbād kar ke dost pachhtāne se kyā hāsil
churā kaare kunad aaqil ki baaz aabid pashemānī

jamāl-e-dost bhī mushtāq-e-yak-nazar hai jahāñ
ham us bulandī-e-zauq-e-nazar se guzre haiñ

ai dost dard-e-dil kā mudāvā kiyā na jaa.e
va.ada agar kiyā hai to iifā kiyā na jaa.e

ye barq-o-sharar ye shams-o-qamar dete haiñ nishān-e-manzil kyā
ai dost hameñ ho saktā hai andāza-e-rañg-e-mahfil kyā

kyā kyā aziiz dost mile 'mīr' ḳhaak meñ
nādān yaañ kaso kā kaso ko bhī ġham huā

kohsār ke dāman meñ havā tez bahut hai
par ye ki mirā dost kam-āmez bahut hai

dostī kī tum ne dushman se ajab tum dost ho
maiñ tumhārī dostī meñ mehrbāñ maarā gayā

ḳhulūs shart hai pī lūñgā zahr bhī ai dost
to pahle siikh mujhe Dhañg āzmāne kā

haañ aise dost kī bhī zarūrat nahīñ mujhe
jo sirf aur sirf zarūrat meñ kaam aa.e