Tags-Dost

ḳhat use bhejnā zarūr magar
dost se ḳhvāhish-e-javāb abas

jaatā hai kyā harīf sū-e-kū-e-dost phir
dām-e-havas meñ dāna-e-pinhāñ liye hue

māhtāb aur katāñ kā aalam hai
āriz-e-dost par naqāb abas

taslīm kī nazar se karishme razā ke dekh
begāngi-e-dost ko apnā banā ke dekh

ġham-gusārī meñ dost kī 'ādil'
rañj sahtā huuñ muskurātā huuñ

ai mire purāne dost
kyā kahā na.ī ġhazal

dost ḳhush hote haiñ jab dost kā ġham dekhte haiñ
kaisī duniyā hai ilāhī jise ham dekhte haiñ

ta.alluqāt 'humairā' kabīda hone meñ
nigāh-e-dost kī āvāz bhī karaḳht huī

'rasā' mahv-e-fasāhat dost kyā dushman bhī haiñ saare
zamāne meñ tire tarz-e-suḳhan kī yādgārī hai

badalte rahte haiñ poshāk dushman-e-jānī
magar jo dost haiñ paikar badalte rahte haiñ

is darja bhī māyūs na dekhī thiiñ bahāreñ
duniyā meñ haiñ ai dost bahut mulk-e-ḳhizāñ aur

allāh re husn-e-dost kī ā.īna-dāriyāñ
ahl-e-nazar ko naqsh-ba-dīvār kar diyā

kise dost apnā banā.eñ ham kise dil kā haal sunā.eñ ham
sabhī ġhair haiñ sabhī ajnabī tire gaañv meñ mire shahr meñ

jiite jī pā.ūñ dost kā dīdār
'nāsiḳh' aise mire nasīb nahīñ

zulm-pesha zulm-sheva zulm-rān o zulm-dost
dushman-e-dil dushman-e-jāñ dushman-e-tan aap haiñ

musībatoñ ke bhañvar meñ pukārte haiñ mujhe
ajiib dost haiñ lete haiñ imtihān mirā

use malāl ho kyā dost kī judā.ī kā
jo sah chukā ho ġham-o-rañj āshnā.ī kā

ye daur kaisā hai yā-ilāhī ki dost dushman se kam nahīñ hai
ḳhulūs-e-har-rahbar-e-zamāna fareb-e-rahzan se kam nahīñ hai

pahle to kahā 'rāv' koī sher sunāo
phir dost mirī baat ke ma.anī nahīñ samjhe

dil kā saudā mujhe manzūr hai lekin ai dost
merā ham-zauq bhī hai mūnis-o-ġham-ḳhvār bhī hai