Tags-Dost

nahīñ āb-e-baqā juz jalva-e-dost
kisī lab-tishna-e-dīdār se pūchh

vo mere dost jo ek ek karke duur hue
maiñ un ko aaj bhī apne qarīb paatā huuñ

ai dost ham ne tark-e-mohabbat ke bāvajūd
mahsūs kī hai terī zarūrat kabhī kabhī

na qaid-e-shar.a baaqī hai na āzādī kī hai kuchh had
nahīñ kuchh guftugū is baab meñ ye nek hai yā bad

tū hasīn hai so muġhālate meñ na ḳharch ho
mire dost dil se tujhe zarā nahīñ chāhtā

hijr kā mashvara mufīd hogā
dost hai bad-sigāl thoḌī hai

yahī soch kar tum dil kī rakhvālī karnā dost
kaḌī dhuup meñ ye kāġhaz bhī nam ho jaatā hai

yād-e-jamāl-e-dost ke qurbān jā.iye
taskīn pā rahā huuñ dil-e-be-qarār meñ

dilchasp vāqi.a hai ki kal ik aziiz dost
apne mafād par mujhe qurbān kar gayā

liyā hai ham ne bhī bosa diyā hai us ko jo dil
ye sach hai dost diloñ meñ hisāb rakhte haiñ

dil ko khoyā ḳhud bhī kho.e duniyā khoī diin bhī khoyā
ye gum-shudagī hai to ik din ai dost tujhe bhī khonā hai

ajnabī mujh se aa gale mil le
aaj ik dost yaad aa.e mujhe

sunñe vaalo ġhaur na karnā varna ḳhafā ho jāoge
jin ko ham ne dost kahā hai ham un se begāne haiñ

u nukta kar yaqīñ maiñ har chiiz ko jo dekhyā
begāna kiiñ disyā niiñ bin dost chaukdan meñ

apnī ġhalat ravish ko na tabdīl kar sake
kuchh dost baar baar guzārish ke bāvajūd

taraf-e-ka.aba na jā haj ke liye nādāñ hai
ġhaur kar dekh ki hai ḳhāna-e-dil maskan-e-dost

kyuuñ haiñ nadīm-e-dost sifārish meñ ġhair kī
kyā ham ko un se rasm-o-rah-e-armuġhāñ nahīñ

zebā nahīñ hai dost se karnā mo.āmla
kuchh varna naaz jaan ke badle girāñ nahīñ

dost hī jaan ko bhī aate rahe
dostoñ hī se zindagī bhī milī

apne kirdār ko ab kaise bhulā.ūñ ai dost
apnī hī laash ko ab kaise uThā.ūñ ai dost