Tags-Dost

pahan ke dost bhī nikle libās-e-tanz 'hasan'
vo apnī aan meñ be-qā.ida huā so huā

sulūk-e-dost ne kyā aisā kar diyā hai 'kiran'
ki umr kaT ga.ī dil ko magar qarār nahīñ

utnī der sameTūñ saare dukh tere
jitnī der ai dost bikhar nahīñ jaatā maiñ

raazī haiñ ham ki dost se ho dushmanī magar
dushman ko ham se dost banāyā na jā.egā

soch mat ai dost tere ba.ad kyā hogā ye soch
ya.anī mere ba.ad phir mujh sā koī paidā na ho

vo rāh-rau huuñ ki manzil nahīñ qayām nahīñ
talāsh-e-dost meñ kuchh qaid-e-sub.h-o-shām nahīñ

vo ulfat dost hoñ nāseh duā hī dil se niklī hai
agar dushman ke ghar bhī majma-e-ahbāb dekhā hai

ye dil bhī dost zamīñ kī tarah
ho jaatā hai Dāñvā-Dol kabhī

kuchh ḳhayāl-e-dost aayā thā ki aa pahuñchī bahār
jis taraf dekhā gulistāñ hī gulistāñ ho ga.e

iltifāt-e-dost kā mumkin nahīñ koī sila
kam hai jān-o-dil jo sarf-e-shukr-e-ehsāñ ho ga.e

kyā zamāne kā gilā 'sāqib' kisī kā kyā qusūr
ye dil-e-ġham-dost ḳhud hī dushman-e-ārām thā

pahle bhī jis pe mire sabr kī had ḳhatm huī
tū ne kar dī nā vahī baat dobāra mire dost

kyā sharh-e-nigāh-e-dost karūñ dekhā hī nahīñ kuchh is ke sivā
hotā hai ināyat dard bahut aur dard kā darmāñ kuchh bhī nahīñ

dost kā dar aa gayā to ḳhud-baḳhud jhukne lagī
jis jabīñ ko be-niyāz-e-āstāñ samjhā thā maiñ

dost kī ho madad to yak dam meñ
jaa.e ye ma.arka tamām palaT

faqr kyā hai ba-dost pevastan
ġham kā irfāñ hai āgahī kyā hai

dost un kā jo hai barbād to dushman hai ḳharāb
lutf achchhā na hasīnoñ kī adāvat achchhī

āḳhir kaar mere dost
tum ne āñkhoñ kī tajdīd kā faisla kar hī Daalā

visāl-e-dost bhī bād-e-visāl hai shāyad
ki jo udhar ko gayā phir idhar nahīñ aatā

hasrat-e-vasl-o-ġham-e-hijr-o-ḳhayāl-e-ruḳh-e-dost
mar gayā maiñ pe mire jī meñ rahā kyā kyā kuchh