Tags-Dost

mustaqil haath milāte hue thak jaatā huuñ
meñ na.e dost banāte hue thak jaatā huuñ

zamāne bhar ko mubārak ḳhushī kā aalam ho
hamāre vāste ai dost tum kahāñ kam ho

ye sikhāyā hai dostī ne hameñ
dost ban kar kabhī vafā na karo

tire baġhair bhī zinda huuñ dekh le ai dost
ab aur kyā tū mujhe āzmānā chāhtā hai

maiñ kyā karūñ dimāġh ne taḳhta ulaT diyā
ab dil pe dost terī hukūmat nahīñ rahī

mahfil-e-dost kī raunaq meñ haiñ 'shahzād' magar
dil kā ye haal ġharīb-ul-vatanī ho jaise

tire dil pe haq hai jahāñ kā bhī ye farār-e-ishq ravā nahīñ
ġham-dost ḳhuub hai jab talak ġham-e-zindagī ko bhulā na de

mirī zindagī kī haqīqatoñ ko na pūñchh aur maiñ kyā kahūñ
mirā dost aaj vahī hai jo mujhe zindagī kī duā na de

dost jab dil sā āshnā hī nahīñ
ab hameñ ġhair kā gila hī nahīñ

ajnabiyyat ke yaḳh-kadoñ meñ dost
ḳhud kalāmī pe zindagī hai faqat

jazb hoñge abhī is ḳhāk-e-chaman meñ ai dost
ashk ban ban ke guhar-reza-e-shabnam kitne

muḳhtār huuñ ki mo'tarif-e-jabr-e-dost huuñ
majbūr huuñ ki ye bhī koī iḳhtiyār hai

ik ye vafā ki nañg-e-ġham-e-dost hai hunūz
ik vo sitam ki husn kā ā.īna-dār hai

ye jo dushman ġham-e-nihānī hai
ye bhī ik dost apnā jaanī hai

'ġhālib' nadīm-e-dost se aatī hai bū-e-dost
mashġhūl-e-haq huuñ bandagi-e-bū-turāb meñ

dost ban kar karte haiñ nekī ke parde meñ badī
rāj-niyyat ye hai dekho aġhniyā ke joḌ-toḌ

hai ta.āqub meñ 'na.īmī' saaya sā ik roz o shab
dost hī shāyad ho koī muḌ ke to dekho zarā

ai dil huzūr-e-dost ba-sad ehtirām jā
dāman ko chaak kar na garebāñ ko chaak kar

harīm-e-rāz umīd-e-karam ki zauq-e-numūd
ḳhulūs-e-dost kī qīmat badaltī rahtī hai

dost ban ban ke mile mujh ko miTāne vaale
maiñ ne dekhe haiñ ka.ī rañg zamāne vaale