Tags-Duniya

tum husn kī ḳhud ik duniyā ho shāyad ye tumheñ mālūm nahīñ
mahfil meñ tumhāre aane se har chiiz pe nuur aa jaatā hai

aur kitnī ghumāoge duniyā
ham to sar thaam kar khaḌe hue haiñ

ye jahāñ pinhāñ thā ik be-manzarī kī ḳhaak meñ
ham ne chashm-e-shauq se dekhā to duniyā kar diyā

ai ḳhudā hai hasīñ tirī duniyā
par mirā jī uchaT gayā afsos

duniyā ko hādsoñ meñ giraftār dekhnā
jab dekhnā ho dostoñ aḳhbār dekhnā

yuuñ hī be-ma.anī be-mauqa
nāchne lagtī hai duniyā dil giit sunātā hai

bhaTak kar aa.ī thī kuchh der ko idhar duniyā
lipaT ga.ī mire dil se kisī balā kī tarah

sail-e-ġham-e-duniyā ne dil se kyā kyā naqsh miTā.e
hijr kī rātoñ meñ ab terī shakl bhī yaad na aa.e

maiñ tanhā.ī ko apnā ham-safar kyā maan baiThā
mujhe lagtā hai mere saath duniyā chal rahī hai

aan kī aan meñ ho ga.ī duniyā aur se aur
ham tum baiThe rah ga.e biite pal ke saath

duniyā kī ye riit hai māñge bhiik na de
paa.e vahī jo chhīn le baḌh kar bal ke saath

qubūl hai ġham-e-duniyā tire havāle se
ye bojh varna sambhaltā nahīñ sambhāle se

mujhe bhī shauq hai duniyā ko fat.h karne kā
magar pahāḌ ko ujlat meñ sar nahīñ karte

haiñ tez duniyā ke qadam shāyad sajal chal paa.eñ ham
is besvā raftār meñ yādoñ se kyuuñ rishte na hoñ

lāzim the ham bukārat-e-duniyā ko ai falak
tiiñ dī ye duḳht un ko jinheñ baah hī nahīñ

kyā dhund hai ashkoñ kī musallat dil o jaañ par
dekhī huī duniyā bhī dikhā.ī nahīñ detī

tujhī ko jo yaañ jalva-farmā na dekhā
barābar hai duniyā ko dekhā na dekhā

duniyā se laḌ jā.iye āsān hai kahnā huzūr
dekhiye har shaḳhs meñ itnā jigar hotā nahīñ

ġham-e-jānāñ kī aziyyat ġham-e-duniyā kā azaab
zindagī maiñ ne guzārī baḌe āzār ke saath

but yahāñ milte nahīñ haiñ yā ḳhudā miltā nahīñ
azm mustahkam to ho duniyā meñ kyā miltā nahīñ