Tags-Duniya

ḳhāmushī sad zabān-o-bayāñ kī tarah
apnī duniyā ke dukh dard kahtī huī

raat ga.e tak ghā.el naġhme karte haiñ elaan yahāñ
ye duniyā hai sañg-diloñ kī koī nahīñ insān yahāñ

duniyā kā ye gorakh dhandā
kaise be-auhām chalegā

bajā tirā nāz-e-be-niyāzī magar ye insāf bhī nahīñ hai
ki terī duniyā meñ tere bande butoñ kī dete phireñ duhā.ī

kabhī duniyā ho kabhī tum kabhī taqdīr ḳhilāf
roz ik taaza sitam ho to ġhazal hotī hai

na terī yaad na duniyā kā ġham na apnā ḳhayāl
ajiib sūrat-e-hālāt ho ga.ī pyāre

na farq aayā 'habīb'-e-sābir-o-shākir kī rāhat meñ
banā duniyā meñ qismat kā likhā tahrīr patthar kī

saarī duniyā kī ne.amateñ 'dānish'
tirī muskāñ pe vaar dūñgā maiñ

saarī duniyā mutalātim nazar aatī hai 'nadīm'
mujh pe ik tanz huā rauzan-e-zindāñ na huā

ab nahīñ kaam koī duniyā kā
goyā ye din haiñ baḌe kaam ke din

tum kyuuñ ho pareshān ki taqdīr kā likkhā
duniyā ke miTāne se miTā hai na miTegā

sirf itne ke liye āñkheñ hameñ baḳhshī ga.iiñ
dekhiye duniyā ke manzar aur ba-ibrat dekhiye

māyūs bhalā kyuuñ haiñ ye duniyā ke manāzir
ab āñkhoñ meñ bīnā.ī liye aa to ga.e ham

hameñ hai vasl kī ḳhvāhish magar ye kaam duniyā ke
maiñ jaanā bhuul jaatā huuñ vo aanā bhuul jaatā hai

asar-e-manzil-e-maqsūd nahīñ duniyā meñ
raah meñ qāfila-e-reg-e-ravāñ hai ki jo thā

dīn-o-duniyā kā talabgār hanūz 'ātish' hai
ye gadā sā.il-e-nadq-e-do-jahāñ hai ki jo thā

vo baat kaho jis ko tarastī rahe duniyā
vo harf likho jis meñ koī fan nazar aa.e

is duniyā meñ apne parā.e kī hai 'sahar' pahchān kise
mahfil-e-jāñ meñ mujh ko aa.e ek zamāna biit gayā

ai marg-e-ishq terī navāzish kā shukriya
duniyā kī talḳhiyoñ se farāġhat milī mujhe

kaise aa saktī hai aisī dil-nashīñ duniyā ko maut
kaun kahtā hai ki ye sab kuchh fanā ho jā.egā