Tags-Duniya

maiñ ahl to nahīñ huuñ ki dekhe koī magar
duniyā mujhe bhī dekh tirā aa.inā huuñ maiñ

hazār ne.mat-e-duniyā ne ham ko lalchāyā
halāl luqma hamārā harām ho na sakā

roz naqsha banā ke duniyā kā
rañg-e-amn-o-sukūn bhartā huuñ

jaane kis duniyā meñ sotī jāgtī haiñ
jin āñkhoñ se ḳhvāb hamārā aatā hai

maiñ aur huuñ alā.eq-e-duniyā ke daam meñ
merā na ek haath na us ke hazār haath

bazm-e-duniyā thī qābil-e-jannat
ḳhuub bantī agar yahīñ bantī

hamāre dil kā ta.alluq nahīñ zamāne se
sau apnī ḳhvāhish-e-duniyā uThā yahāñ se nikal

āñkhoñ ke pyāle meñ duniyā rahtī hai
us ko dekhūñgā man kī bīnā.ī se

ḳhushiyoñ kā mukh chuum ke dekhā duniyā mān-bharī
dukh vo sajan kaThor ki jis ko ruuh kare sajda

duniyā kī ravish dekhī tirī zulf-e-dotā meñ
bantī hai ye mushkil se bigaḌtī hai zarā meñ

terā dāman chhoḌūñ kaise
merī duniyā terā dāman

judā hai ne.mat-e-duniyā se lazzat bosa-e-lab kī
vo jogī ho gayā jis ne ye mohan-bhog chakkhā hai

duniyā ke shor-o-shar se bahut tañg aa ga.e
mumkin hai ab tirī hī galī amaañ mile

be-sūd qafas meñ hai har āsā.ish-e-duniyā
parvāz ko āzād fazā aur hī kuchh hai

haa.e duniyā vo tirī surma-taqāza āñkheñ
kyā mirī ḳhaak kā zarra koī bekār nahīñ

tū aam farebī mujh se na kar ham mard haiñ sun le ai duniyā
jo muñh se kahā vo kar guzre jo Thaan liyā vo Thaan liyā

aqsām the yās-o-hasrat ke asnāf-e-umīd-e-behad ke
jab chalne lage ham duniyā se saath apne bahut sāmān liyā

jis bhes meñ tū ho kyā parvā ā.inda na khā.egī dhokā
ai tālib-e-duniyā duniyā ne har tarah tujhe pahchān liyā

mubārak mubārak nayā saal aayā
ḳhushī kā samāñ saarī duniyā pe chhāyā

kisht-e-duniyā kyā ḳhabar kyā phal mile
tuḳhm-e-ġham ham ne to aa kar bo diyā