Tags-Duniya

duniyā ḳhayāl-o-ḳhvāb hai merī nigāh meñ
ābād sab ḳharāb hai merī nigāh meñ

dil-o-jāñ bhī nahīñ duniyā bhī nahīñ hai apnī
sochte haiñ ki yahāñ kyā hai hamārā baaqī

merī ḳhvāhish ki terī yaad se ġhāfil na rahūñ
fikr-e-duniyā terī yādoñ ko miTānā chāhe

zehn duniyā kī haqīqat ko samajhne pe musir
dil ki bas ḳhvāboñ kī bastī meñ Thikānā chāhe

jis ko duniyā se hai āshufta-mizājī kā gila
vo bhī is ālam-e-fānī se na jaanā chāhe

sitam Dhāte ho lekin lutf kā ehsās hotā hai
isī andāz ne duniyā ko dīvāna banā Daalā

chalo achchhā huā duniyā 'hafīz' ab duur hai ham se
mohabbat ne hameñ duniyā se begāna banā Daalā

ham aise sar-phire duniyā ko kab darkār hote haiñ
agar hote bhī haiñ be-intihā dushvār hote haiñ

sabr kī chādar ko oḌhe ḳhvāb-gāhoñ meñ raho
sach kī duniyā chhoḌ kar va.adoñ kī bastī meñ chalo

maiñ ne to ik baat kahī thī baat ko phailāyā hai kitnā
ab maiñ samjhā huuñ duniyā ne mujh ko pahchānā hai kitnā

apnī duniyā ke log lagte haiñ
kuchh haiñ chhoTe to kuchh baḌe haiñ peḌ

tirā ġham aaj tak taaza hai zālim varna duniyā meñ
na.ī shai din guzarne se purānī hotī jaatī hai

duniyā kare talāsh nayā jām-e-jam koī
us kī jagah nahīñ mire jām-e-sifāl meñ

duniyā hai ḳhvāb hāsil-e-duniyā ḳhayāl hai
insān ḳhvāb dekh rahā hai ḳhayāl meñ

dil mire dil ġham-e-duniyā se nipaT le ki abhī
tujhe karnī hai na.e zaḳhm kī mehmānī bhī

jab bhī koī detā hai dar-e-ḳhvāb pe dastak
maiñ sochne lagtā huuñ ki duniyā hai ki tum ho

duniyā bas is se aur zyāda nahīñ hai kuchh
kuchh roz haiñ guzārne aur kuchh guzar ga.e

mujhe bhī shauq hai duniyā ko zer karne kā
maiñ apne aap ko tasḳhīr kartā rahtā huuñ

tālib ko apne rakhtī hai duniyā zalīl o ḳhvār
zar kī tama.a se chhānte haiñ ḳhaak niyār.iye

kināroñ se guzar jaanā hī tūfānoñ kī fitrat hai
jahāñ duniyā Thahar jaa.e qadam merā vahāñ kyuuñ ho