Tags-Duniya

badnāmī o barbādī anjām-e-mohabbat haiñ
duniyā meñ rahā 'farhat' rusvā-e-jahāñ ho kar

yuuñ basar kar rahā huuñ duniyā meñ
zindagānī azaab ho jaise

ik an-jānī duniyā DhūñD rahā huuñ
tārīkī meñ rasta DhūñDh rahā huuñ

kaun se maz.hab meñ likkhā hai ki nafrat dharm hai
mil ke is duniyā se nafrat ko miTānā chāhiye

kaun sūd-o-ziyāñ kī duniyā meñ
dard ġhurbat kā saath detā hai

azīm-tar thī nazar kī duniyā
hasīn thiiñ aarzū kī rāheñ

naam hai 'asrār' merā mohtaram
saarī duniyā jāntī hai besh-o-kam

mirī mohabbat meñ saarī duniyā ko ik khilaunā banā diyā hai
ye zindagī ban ga.ī hai maañ aur mujh ko bachcha banā diyā hai

kū-e-qātil meñ basegī na.ī duniyā ik aur
roz hotā hai nayā shahr-e-ḳhamoshāñ ābād

asrār agar samjhe duniyā kī har ik shai ke
ḳhud apnī haqīqat se ye be-ḳhabarī kyuuñ hai

yahāñ sochoñ ke par kaise khuleñge
mahz jismoñ pe sab duniyā rukī hai

basā.ī maiñ ne jo qalb-e-hazīñ meñ
vo duniyā kaam aa.ī kār-e-dīñ meñ

bahut kuchh pāoge duniyā meñ pyāre
mohabbat pāoge lekin hamīñ meñ

uThā uThā ke tire naaz ai ġham-e-duniyā
ḳhud aap hī tirī aadat ḳharāb kī ham ne

kal raat ma.arka thā ajab darmiyān kā
merī to yaar ḳhair hai duniyā kā kyā huā

parā.e aur apne dafn kar ke lauT aate haiñ
jo tanhā aayā hai duniyā se vo tanhā hī jaatā hai

ab bhī mujhe apnā.e na duniyā to karūñ kyā
māhaul se paimān-e-vafā bāñdh rahā huuñ

kahāñ kā zarf kahāñ kā vaqār ye duniyā
nigāh jeb pe rakh kar salām kartī hai

maiñ jab bistar se uThtā huuñ to yuuñ mahsūs hotā hai
mire andar kī duniyā raat bhar sotī nahīñ shāyad

maiñ baiThe baiThe yuuñ hī raqs par utar aayā
phir ek aan meñ duniyā ye dhuul hone lagī