Tags-Earthquake

maanā ki zalzala thā yahāñ kam bahut hī kam
bastī meñ bach ga.e the makāñ kam bahut hī kam

tūfān zalzala kabhī sailāb aa gayā
pur-amn to ḳhudā bhī hukūmat na kar sake

zalzala aayā vo dil meñ vaqt kī raftār se
ḳhud-baḳhud tasvīr terī gir paḌī dīvār se

kuchh aaj zalzala sā zamīñ ko hai gor meñ
'taskīn'-e-be-qarār magar ārmīda hai

ḳhud-parastī ke mahallāt meñ rahne vaalo
zalzala aane ko hai larzish-e-pā jāntī hai

zalzala gor meñ majnūñ kī paḌā rahtā hai
apnā ye shor hai ab bādiya-paimā.ī kā

zalzala nepal meñ aayā ki hindostān meñ
zalzale ke naam se tharrā uThā saarā jahāñ

ta.allī zamīñ se jo nāloñ ne kī
falak par ayaañ zalzala ho gayā

hastī ko jis ne zalzala-sāmāñ banā diyā
vo dil qarār paa.e muqaddar kī baat hai

tire kushte ko mahshar ḳhvāb-e-āsā.ish kā sāmāñ thā
ki suur afsāna-go thā zalzala gahvāra-jumbāñ thā

daurān-e-zalzala jo panāh-e-nigāh the
leTe hue the paañv pasāre kahāñ ga.e

tum jise baañT rahe ho vo sitam-dīda-zamīñ
zalzala aa.egā kuchh aisā ki phaT jā.egī

ḳhamoshiyāñ tamām ġharq ho ga.iiñ ḳhalāoñ meñ
vo zalzala thā sāhibo bayān bhī nahīñ bachā

har lahza inhidām kā hai ḳhauf mujh ko 'hosh'
maiñ is dayār-e-shor-o-shar-e-zalzala meñ huuñ

aah kī zalzala-andāzī se
arsh ke paa.e ukhaḌ jaate haiñ

maiñ jalā to sho.ale meñ josh thā jo huā maiñ ḳhaak hai zalzala
maiñ hazār shakl badal chukā pa kisī tarah na chhupā qalaq

mujhe meñ ik zalzala sā hai 'shāhid'
maiñ ka.ī din se intishār meñ huuñ

zabāñ hile na hile dil hile to kaam chale
ye zalzala ho to aa jaa.e guftugū merī

kabhī jab zalzala aa.e
to us kī jhurjhurī sī muḳhtalif umroñ ke ghar

ye sab sahī ki zalzala hai tā-falak magar
shoḳhī to apnī dekh mirā iztirāb kyā