Tags-Earthquake

tāmīr-e-nau qazā-o-qadar kī nazar meñ hai
aaj ek zalzala sā har ik bām-o-dar meñ hai

zamīn hiltī thī yuuñ hī hamāre aane se bhī
isī tarah kā kabhī zalzala hamārā bhī thā

taḌap na pūchho dil-e-hazīñ kī kahūñ maiñ tum se kahāñ kahāñ kī
usī se hai gardish āsmāñ kī usī se hai zalzala zamīñ kā

us ne mujh ko yaad farmāyā yaqīnan
jism meñ aayā huā hai zalzala sā

log malboñ meñ dabe saa.e bhī dafnāne lage
zalzala ahl-e-zamīñ ko bad-havāsī de gayā

joñ ḳhuftagān-e-ḳhāk hai apnī fatādgī
aayā jo zalzala kabhī karvaT badal gayā

ek āvāz aa.ī ki aurat huuñ maiñ
barq huuñ zalzala huuñ qayāmat huuñ maiñ

ye sail-e-āb na thā zalzala thā paanī kā
bikhar bikhar ga.e qarye mire basā.e hue

ye azāboñ kā silsila kyā hai
baaḌh bīmārī zalzala kyā hai

apne siine meñ haiñ Thahrī huī sāñseñ kab se
zalzala ban ke to aa maiñ tah-o-bālā ho jā.ūñ

ilaaj un kaa, jo haiñ is zamīñ kā bojh, miyāñ!
koī ḳharosh koī zalzala hī tai karegā

tum jo baiThī ho saas ke nazdīk
zalzala koī aane vaalā hai

daur-e-masarrat 'ārzū' apnā kaisā zalzala-āgīñ thā
haath se muñh tak aate aate chhūT paḌā paimāna bhī

jis qalandar ne rakhā Thokar meñ taḳht-o-tāj ko
vo zarā sā sar hilā de zalzala ho jā.egā

har ek samt hai chhāyā sukūt kā manzar
dhaḌak rahā hai magar zalzala mire andar

rahegī chaar dīvār-e-anāsir darmiyāñ kab tak
uThegā zalzala ik din isī baiThe hue dil se

be-yār sar paTakne se hiltā hai ghar mirā
rahtā hai zalzala dar-o-dīvār ke liye

zalzala thā ki mirā vahm thā kuchh thā jis se
thartharā uTThe mire haath aur in ke nīche

zindagī jis kī ujaḌ jaatī hai is se pūchho
zalzala shahr meñ aatā hai chalā jaatā hai

ḳhatar-pazīr huuñ us be-dilī meñ girya bhej
ye zalzala hī mire bām-o-dar sambhālegā