Tags-Aankh

aañkh kī ye ek hasrat thī ki bas puurī huī
āñsuoñ meñ bhiig jaane kī havas puurī huī

musalsal aañkh meñ yuuñ aanā jaanā āñsuoñ kā hai
mirā chehra hai aur mehmān-ḳhāna āñsuoñ kā hai

paḌe rahte haiñ us kī diid ke kuchh aks konoñ meñ
vagarna aañkh meñ saarā Thikāna āñsuoñ kā hai

ḳhuuñ ho ke jigar aañkh se Tapkā nahīñ ai marg
rahne de mujhe yaañ ki abhī kaam bahut hai

maiñ rahrav-e-sirāt-e-rāhzan thā thoḌī der ko
samajh rahā thā maiñ merī na aañkh hai na kaan hai

koī manzar bhī ab nahīñ bhātā
mustaqil aañkh meñ khaTak hai kyā

ye sāneha bhī mohabbat meñ bār-hā guzrā
ki us ne haal bhī pūchhā to aañkh bhar aa.ī

khulī jo aañkh to kuchh aur hī samāñ dekhā
vo log the na vo jalse na shahr-e-rānā.ī

kaan vo kaan hai jis ne tirī āvāz sunī
aañkh vo aañkh hai jis ne tirā jalva dekhā

husn-e-be-tamāshā kī dhuum kyā muammā hai
kaan bhī haiñ nā-mahram aañkh bhī tarastī hai

ġham kā dariyā suukh na jaa.e us kī ravānī kam na paḌe
ḳhūn-e-jigar bhī shāmil kar luuñ aañkh meñ paanī kam na paḌe

ġhussa meñ aañkh bhī nahīñ miltī kisī se aaj
kis par gire nigāh kā shahbāz dekhnā

chauk uThtā huuñ aañkh lagte hī
koī saaya pukārtā hai mujhe

maiñ ne is shahr meñ vo Thokareñ khaa.ī haiñ ki ab
aañkh bhī muuñd ke guzrūñ to guzar jaatā huuñ

ġham-e-hastī bhalā kab mo'tabar ho
mohabbat meñ na jab tak aañkh tar ho

'mahak' aañkh se Tapkā paanī bahut hai
nadāmat se aañsū bahāne lagī hai

aisā bīmār banātī hai tirī aañkh mujhe
aise gulnār tire gaal se maiñ hotā huuñ

sā.il-e-bosa haiñ un ko dekh chashm-e-qahr se
aañkh ke Dheloñ se ai but ḳhātir-e-aġhyār toḌ

aañkh kholte hī kyuuñ is qadar masarrat hai
sub.h-dam 'munavār' kyā tum ne kuchh paḌā paayā

har aañkh lahū sāgar hai miyāñ har dil patthar sannāTā hai
ye gañgā kis ne paaTī hai ye parbat kis ne kaaTā hai