Tags-Aankh

aañkh bhar ke vo dekhtā hai mujhe
is kā matlab visāl thoḌī hai

koī ummīd na jis baat kī thī kaise huī
kaise pathrā.ī huī aañkh meñ aañsū aa.e

tere liye jab aañkh barastī hai raat ko
phir dil ke saath saath sulagtī hai zindagī

zarā tez-gām baḌhe chalo hai fazā-e-sahrā musāfiro
jahāñ aañkh dil kī jhapak ga.ī vahīñ zindagī kā mazār hai

ḳhvāb haiñ aur kuchh malāl bhī haiñ
aañkh meñ sirf ratjage hī nahīñ

jag se bhalā sansār se pyārā
dil kī ThanDak aañkh kā taarā

aañkh meñ jalva tirā dil meñ tirī yaad rahe
ye mayassar ho to phir kyuuñ koī nāshād rahe

sozan misāl aañkh meñ siltī hai har palak
terī birah kā ḳhaar dil-āzār thā so hai

aañkh ke kunj meñ ik dasht-e-tamannā le kar
ajnabī des ko nikle dil-e-tanhā le kar

ek saudā hai lazzat-e-ġham hai
aaj phir merī aañkh pur-nam hai

tā-ba-kai manzil-ba-manzil ham musāfir bhāgte
aañkh ab Thahrī huī hai aur manāzir bhāgte

chamaktī aañkh meñ sahrā dikhā.ī saaf detā hai
mire lahje meñ sannāTā sunā.ī saaf detā hai

shahr to sābit huā shahr-e-ḳhayāl
aañkh meñ bas ik dhuñdlakā rah gayā

mujh se aġhyār koī aañkh milā sakte haiñ
muñh to dekho vo mire sāmne aa sakte haiñ

jahāñ kī kā.enāt kyā hai umīd-e-uqbā meñ kyā dharā hai
barī haiñ jo us se vo na dekheñ idhar zarā aañkh bhī uThā kar

kyā husn thā ki aañkh lagī saaya ho gayā
vo sādgī kī maar, hayā kam bahut hī kam

paañv meñ aañkh to nahīñ phir bhī
dekhte haiñ qadam ye manzil ko

aañkh do ik ġham meñ rotī hī nahīñ
abr yakjā ho ke bārish karte haiñ

ham se to bas bāñdhe rakhtī sharm kī paTTī āñkhoñ par
chorī chorī mahfil meñ par aañkh laḌānī auroñ se

ḳhvāb meñ gum huuñ ki bāhar kī fazā achchhī nahīñ
aañkh khulte hī kahīñ zanjīr ho jaatā huuñ maiñ