Tags-Aankh

bas ye hai intihā ta.alluq kī
zikr par un ke aañkh bhar aa.ī

ek sūraj thā ki tāroñ ke gharāne se uThā
aañkh hairān hai kyā shaḳhs zamāne se uThā

hamārī aañkh se noche ga.e haiñ sab hasīñ manzar
nazar chhīnī ga.ī hai aur nazāre bech Daale haiñ

ḳhushk ho jā.egī rote hue sahrā kī tarah
kuchh bachā kar bhī to is aañkh meñ aañsū rakkho

aañkh jo nam ho vahī dīda-e-tar merā hai
mauj-e-ġham uTThe kahīñ us kā guhar merā hai

kuchh dinoñ se jo tabī.at mirī yaksū kam hai
dil hai bhar-pūr magar aañkh meñ aañsū kam hai

kahāñ kā ḳhvāb musāfir kī aañkh meñ 'āzim'
ki bahte paanī meñ manzar Thaharne vaalā nahīñ

maiñ kyā batā.ūñ tire ġham meñ kyā guzartī hai
vo kaun lamha hai jab aañkh tar nahīñ hotī

ġham se nibāh kījiye is tamkanat ke saath
dil kā sharāra aañkh kī had tak machal na jaa.e

ujāle simaTte rahe aañkh meñ
sitāre bikharte rahe farsh par

khul ga.ī aañkh ab to ai nargis
aur un se nazar milā gustāḳh

aañkh meñ bikhrā huā hai jāgte ḳhvāboñ kā rañg
kaan meñ simTī huī hai bhāgte sāyoñ kī guuñj

kaisā ḳhvāb aur niiñd kahāñ kī
muddat ho ga.ī aañkh lagā.e

aañkh thī suujī huī aur raat bhar soyā na thā
is tarah vo TuuT kar shāyad kabhī royā na thā

dard thā haijān thā par aañkh meñ aañsū na the
jaise dil tak aate aate hādisa kam paḌ gayā

ai sanam terī karanjī aañkh se sābit huā
rañg uḌ jaatā hai rū-e-mardum-e-bīmār kā

ye jo aañkh aaj chhalak uThī mire dil kā bhed hī khul gayā
maiñ samajh rahā thā ye ab talak ġham-e-be-nishāñ mire saath hai

maiñ ne is shahr meñ vo Thokareñ khaa.ī haiñ ki ab
aañkh bhī muuñd ke guzrūñ to guzar jaatā huuñ

mohabbat kyā balā hai chain lenā hī bhulā de hai
zarā bhī aañkh jhapke hai to betābī jagā de hai

aañkh kī raah se bujhte hue lamhe utre
aqrabā jitne the kashtī ke vo saare utre