Tags-Aankh

ye aur baat ki dil ġham meñ ḳhud kafīl huā
magar vo aañkh mire ġham meñ ashk-bār rahī

shab-e-furqat hai Thaharte nahīñ sho.ale dil meñ
taara TuuTā ki mirī aañkh se aañsū TuuTā

aaj kī raat kaTegī kyuuñ kar saaz na jaam na to mehmān
sub.h talak kyā jāniye kyā ho aañkh lage yā jaa.e jaan

hamārī aañkh meñ tinkā paḌā hai āñdhī se
kaho na ashk ye bechārgī se nikle haiñ

ik hasīñ aañkh ke ishāre par
qāfile raah bhuul jaate haiñ

ban kar rusvā.ī ke aañsū
terī aañkh se ham barseñge

to vo matā.a hai ki paḌī jis kī tujh pe aañkh
vo jī ko bech kar bhī ḳharīdār ho gayā

bhar ga.e zaḳhm sil gayā dāman
aañkh bhī dekho ashk-bār nahīñ

vo ḳhush-nasīb the jinheñ apnī ḳhabar na thī
yaañ jab bhī aañkh kholiye aḳhbār dekhiye

aañkh ke ek ishāre se kiyā gul us ne
jal rahā thā jo diyā itnī havā hote hue

jī meñ aa jaa.e to ham bhī muskurā kar dekh leñ
aañkh phir pahroñ na kholeñ shahryārī aur kyā

ye dhuup chhāñv ke asrār kyā batāte haiñ
jo aañkh ho to usī kā pata batāte haiñ

jo us aañkh se niklā hogā
aañsū mere jaisā hogā

jal ke hotā ḳhaak soz-e-dil se tan
gar na kartī aañkh ye sāmān-e-ashk

apnī hī aañkh par ga.e lamhoñ kā bojh thā
is kī nazar meñ to vahī jaulāniyāñ milīñ

aañkh kī putlī meñ sūraj sar meñ kuchh saudā ugā
pāniyoñ meñ surḳh paude dhuup meñ saayā ugā

aañkh haa.il hai tirī diid meñ achchhā hogā
aaj ye āḳhirī parda bhī uThā dekhtā huuñ

niiñd kī imdād jaise hī baham pahuñchī mujhe
aañkh ke maqtal meñ apne ḳhvāb ko dāḳhil kiyā

ashk ko dariyā banāyā aañkh ko sāhil kiyā
maiñ ne mushkil vaqt ko kuchh aur bhī mushkil kiyā

ḳhatm ḳhush-fahmi-e-sairābī huī hoñToñ tak
aañkh se dekhā hai pyāsā koī dariyā ham ne