Tags-Aankh

aañkh kā parda agar manzūr hai
chilmaneñ mizhgāñ kī chhoḌā chāhiye

udhar diye kā badan havā se thā paara paara
idhar añdhere kī aañkh meñ ik kiran gaḌī thī

aañkh dikhlāo unheñ marte hoñ jo āñkhoñ par
ham to haiñ yaar mohabbat kī nazar ke āshiq

hai vahī aañkh jo mushtāq tire diid kī ho
kaan vo haiñ jo raheñ terī ḳhabar ke āshiq

maiñ us ko bhuul chukā huuñ ajiib baat hai ye
jo chehra aañkh se ojhal nahīñ huā ab tak

un ke dīvānoñ kī e.ajāz-nigāhī dekho
aañkh uThānā ki gulistāñ ko bayābāñ karnā

ashk-e-ġham aañkh se bāhar bhī nahīñ aane kā
abr chhaT jaa.eñ vo manzar bhī nahīñ aane kā

mujhe samjhā rahī hai aañkh kī tahrīr us kī
vo aadhe rāste se lauT jaanā chāhtā hai

tere ruḳh-e-ḳhāmosh se merī rag-e-jāñ tak
jo kaam kiyā aañkh ne tarsīl to ye thī

ab ke ham ne bhī diyā tark-e-ta.alluq kā javāb
hoñT ḳhāmosh rahe aañkh ne bārish nahīñ kī

apne mushtāq ko lāzim hai ki gaahe maahe
ġhair kī aañkh bachā ghar meñ bulā lījiyegā

ab to tum bhī javāñ hue ho dekheñge dil ko bachāoge tum
mil jo gayā ham-chashm koī phir aañkh usī se laḌāoge tum

ham vo majrūh-e-ziyārat ki sar-e-mahfil bhī
aañkh rakhte haiñ usī parda-nashīñ par sāhab

pahchāntī nahīñ hai use jab kisī kī aañkh
be-kār hai nishān-e-hunar mujh se chhīn le

dūsroñ ko sañg-e-dil kahnā baḌā āsān thā
ḳhud ko jab dekhā to apnī aañkh pathrā.ī milī

sukūñ-girafta na dil hī na aañkh ḳhūñ-basta
tamām umr rahīñ nā-rasā.iyāñ kyā kyā

bhej de mujh ko jahān-e-hissiyāt-o-lams meñ
shor se uljhe samā.at aañkh se manzar laḌe

khultī hai jab aañkh shab ko tujh bin
kaTtī nahīñ aatī phir nazar raat

aayā hai mire dil kā ġhubār āñsuoñ ke saath
lo ab to huī mālik-e-ḳhushkī-o-tarī aañkh

duzdīda nigah karnā phir aañkh milānā bhī
is lauTte dāman ko paas aa ke uThānā bhī