Tags-Aankh

nādim hai bahut tū bhī 'jamāl' apne kiye par
aur dekh le vo aañkh bhī namnāk bahut hai

namī thī aañkh meñ lekin ik e'timād bhī thā
mujhe to hausla jiine kā us ke ba.ad bhī thā

dekhne niklā huuñ duniyā ko magar kyā dekhūñ
jis taraf aañkh uThā.ūñ vahī chehrā dekhūñ

dard āsānī se kab pahlū badal kar niklā
aañkh kā tinkā bahut aañkh masal kar niklā

aañkh jhapkīñ to itne arse meñ
jaane kitne baras guzar jaa.eñ

ḳhazāne DhūñDhtā hai vo agar to le jaa.e
hamārī aañkh se zaa.e.a guhar gayā hai abhī

kiran kiran ne sambhal kar ye ham ko dars diyā
misāl-e-ashk koī aañkh se girā na kare

terī zulfoñ ke bikharne kā sabab hai koī
aañkh kahtī hai tire dil meñ talab hai koī

aañkh kyā aañkh nahīñ tāb-e-nazāra jis ko
dil vo kyā dard-e-mohabbat kā jo hāmil na huā

chaltī rāhoñ meñ yūñhī aañkh lagī hai 'fākir'
bhiiḌ logoñ kī haTā do ki maiñ zinda huuñ abhī

aañkh pathrā ga.ī hai ro ro kar
ashk apnā nikāl chāhte haiñ

aañkh khulī to dekhā ghar meñ koī nahīñ thā
haath lagā kar dekhā to tannūr abhī tak bujhā nahīñ thā

lutf jab hai terī duzdīda nazar
aañkh milte hī mirā dil luuT le

raat ke kisī pahar āsār-e-qadīma ke ek māhir kī aañkh khul jaatī hai
vo lakḌī ke vaznī sandūq se kitāb nikāltā hai

phir huī bedār ḳhvāhish aañkh meñ aa.ī chamak
phir kisī ko dhuup sā malbūs pahnāyā gayā

aañkh kī zid ko hamesha hī se bahlāyā gayā
ek chehre ko ka.ī chehroñ meñ dikhlāyā gayā

aañkh se hijr girā dil ne duhā.ī dī hai
ishq vāloñ kī kahāñ chīḳh sunā.ī dī hai

shor itnā ki sunā.ī na diyā thā kuchh bhī
aañkh kholī hai to āvāz dikhā.ī dī hai

ruuTh kar aañkh ke andar se nikal jaate haiñ
ashk bachchoñ kī tarah ghar se nikal jaate haiñ

raat hamārī maañ jaisī hai
niiñd hamārī aañkh meñ rakh kar