Tags-Aankh

dhanak sī aañkh kahe bāñsurī kī lai meñ mujhe
sitāre DhūñD ke lā naġhmagī meñ bikhre hue

shaam se aañkh meñ namī sī hai
aaj phir aap kī kamī sī hai

do ghūñT bhī na pī sake aur aañkh khul ga.ī
phir bazm-e-aish thī na vo jām-e-surūr thā

der se aañkh pe utrā nahīñ ashkoñ kā azaab
apne zimme hai tirā qarz na jaane kab se

toḌe kitne ā.īne aur chhān liye kitne āfāq
koī na manzar aañkh meñ Thahrā us ke aks-e-jamāl ke baad

thak ga.ī niiñd mire ḳhvāb ko Dhote Dhote
kyā ta.ajjub hai mirī aañkh agar khul jaa.e

dekhte haiñ dūsroñ kī aañkh ke til meñ bhī aib
be-ḳhabar haiñ lekin apnī aañkh ke shahtīr ke

muskurā uThtī thī vo aañkh kabhī
aur ab jumbish-e-abrū bhī nahīñ

ab to aañkh lagā le 'nāsir'
dekh to kitnī raat ga.ī hai

kartā huuñ ek ḳhvāb ke mub.ham nuqūsh yaad
jab se khulī hai aañkh isī mashġhale meñ huuñ

saaf be-parda nahīñ hotā vo ġhurfa meñ na ho
rauzan-e-dar se kabhī aañkh laḌā.e to sahī

aañkh hañste hañste kyuuñ rone lagī
har ḳhushī kartī hai bas ġhamgīn kyā

aañkh ham āshufta-hāloñ se milā.e
gardish-e-daurāñ meñ itnā dam nahīñ

aañkh masrūf hai zambīl-e-hunar bharne meñ
kis ne rakkhī hai kashish arz o samā meñ aisī

jhuuT tū kar ke dikhāvā ban gayā sachchā vahāñ
aur sach kone meñ baiThā aañkh nam kartā rahā

aañkh meñ ism-e-mohammad kī mahak
hoñT par harf-e-duā baaqī hai

'rashīd' lab pe hañsī hai to aañkh nam kar le
na.ī ḳhushī ke muqābil purānā ġham bhī to ho

masjid ke zer-e-sāya ḳharābāt chāhiye
bhauñ paas aañkh qibla-e-hājāt chāhiye

nazar uThā.eñ jo aarsī se to un se pūchhūñ ye maiñ hañsī se
lagā.ī hai aañkh kyā kisī se kaho to ye dekh-bhāl kyā hai

havā-e-shauq tham ga.ī havas kī mel jam ga.ī
kahāñ vo hashr aarzū na dil tapāñ na aañkh nam