Tags-Ehsaan

ehsān tirā mujh par hotā gar ruuh ko kartā tan se judā
jab jaan bachī furqat kī shab ai dard-e-jigar kuchh bhī na huā

hadd-e-sitam to hai bhī hadd-e-vafā nahīñ hai
zālim tirā sitam bhī ehsān ho na jaa.e

dil le ke muft kahte haiñ kuchh kaam kā nahīñ
ulTī shikāyateñ huiiñ ehsān to gayā

sitam kī bhiik sahī dostoñ kā tohfa hai
baḌī ḳhushī se ye ehsān ham uThāte haiñ

dosto Tāñke na do ehsān Tuk itnā karo
le chalo mujh ko vahīñ tum maiñ jahāñ TukḌe huā

masarrat aur rāhat se na thiiñ ra.anā.iyāñ kaafī
'anīs' ehsān ġham ke bhī bahut haiñ nā-tavāñ dil par

raat kā ham par baḌā ehsān hai
ro liyā karte haiñ khul kar raat meñ

kahāñ kisī pe ye ehsān karne vaalā huuñ
maiñ apne aap ko hairān karne vaalā huuñ

ek ehsān hai qudrat kī jafā-kārī par
us kī duniyā meñ bhī jiine kī tamannā karnā

maiñ jab bhī chāhūñ jabhī us se guftugū kar luuñ
mirī ġhazal pe ye ehsān shā.irī ke haiñ

kaun sā pardā ham se thā tum dil kī bāteñ kah sakte the
muft meñ tum ne baat baḌhā.ī ġhairoñ kā ehsān liyā

kuchh aise log bhī haiñ duniyā meñ terī yā-rab
lete nahīñ kisī kā ehsān zindagī meñ

tum ne ehsān kiyā hai ki namak chhiḌkā hai
ab mujhe zaḳhm-e-jigar aur mazā dete haiñ

ai yaado jiine do ham ko bas itnā ehsān karo
dhuup ke dasht meñ jab ham nikleñ ham par saayā mat karnā

gard-e-shohrat ko bhī dāman se lipaTne na diyā
koī ehsān zamāne kā uThāyā hī nahīñ

dām-e-ġham-e-hayāt meñ uljhā ga.ī umiid
ham ye samajh rahe the ki ehsān kar ga.ī

tire ehsān ke gun gā.egā josh-e-vafā-koshī
dakan vāloñ kī fitrat meñ nahīñ ehsāñ-frāmoshī

din bahr-e-hāl guzar hī jaate
dil kā ehsān uThāyā kyuuñ thā

ham us ke haath pe rakh deñ zamīn-o-āsmāñ lā kar
magar vo ham faqīroñ kā kahāñ ehsān letī hai

kaise kaheñ ab lutf se baaz aa.iye sāhab
har baar kā ehsān hilā jaa.e hai kuchh aur