Tags-Ehsaas

taaza zaḳhmoñ se chhalak uTThīñ purānī Tīseñ
varna ham dard kā ehsās nayā rakhte the

jazbāt kī āñkhoñ meñ chamaktā koī sho.ala
ehsās ke ruḳhsār pe kuchh ġhāza bhī hotā

sharbatī rañg se likkho āñkheñ
aur ehsās sharābī hogā

taklīf miT ga.ī magar ehsās rah gayā
ḳhush huuñ ki kuchh na kuchh to mire paas rah gayā

hiddat-e-lams mujhe ātish-e-ehsās lagā
barf-ālūd havāoñ kā jamāyā huuñ maiñ

ehsās kī palkoñ meñ tirī yaad kā partav
ġhamgīn banā detā hai mahfil kā samāñ aur

kab se ehsās pe ik bojh liye phirte haiñ
kaash pūchho ki bharī bazm meñ kyā kyā dekhā

vo lamha guzrā ki sehr TuuTā
yakā-yak ehsās-e-umr jaagā

baḌh gayā hai is qadar ehsās-e-mahrūmī 'shakeb'
log apnī zaat se kaT kar guzar karne lage

tab ye ehsās hameñ hogā ki ye ḳhvāb hai sab
band āñkhoñ ko kareñ ḳhvāb kī duniyā dekheñ

bashar ko quvvat-e-ehsās ne ḳharāb kiyā
jo ye na ho to jahāñ meñ na phir ziyāñ hai na suud

us ko ehsās kī ḳhushbū se rihā karnā thā
phuul ko shāḳh se khilte hī judā karnā thā

lafzoñ meñ ehsās kī kaliyāñ khilā rahā huuñ ai 'maḳhmūr'
jaise koī mujh se kahtā ho aa tere lab chūmūñ maiñ

fazā meñ karb kā ehsās gholtī huī raat
havas kī khiḌkiyāñ darvāze kholtī huī raat

ye tire lams kā ehsās javāñ-tar ho jaa.e
ye tire qurb meñ har saañs javāñ-tar ho jaa.e

ārām-o-musībat kyā shai hai hotā nahīñ kuchh ehsās unheñ
manzil kī jo dhun meñ haiñ 'sābir' din-rāt vo chalte rahte haiñ

maiñ us ke sāmne se guzartā huuñ is liye
tark-e-ta.alluqāt kā ehsās mar na jaa.e

shahr-e-be-ehsās meñ merī sadā-e-ehtijāj
tiir ho jaise añdhere meñ koī chhoḌā huā

nālāñ huuñ maiñ bedārī-e-ehsās ke hāthoñ
duniyā mire afkār kī duniyā nahīñ hotī

māmūra-e-ehsās meñ hai hashr sā barpā
insān kī tazlīl gavārā nahīñ hotī