Tags-Ehsaas

tū haqīqat ko samajhtā hai tilismī tasvīr
tere nazdīk ye ehsās kī ra.anā.ī hai

ghar meñ kuchh kam hai ye ehsās bhī hotā hai 'salīm'
ye bhī khultā nahīñ kis shai kī kamī lagtī hai

ho agar hosh bhī ehsās-e-bahārāñ meñ sharīk
chaak apnā bhī garebāñ nahīñ hone paatā

us se taslīm bas yūñhī sī hai
barf ehsās kī jamī sī hai

tum ne māñgā hai ehsās is Dhañg se
pattharoñ kī ḳhamoshī pighaltī rahe

jashn hogā phir vafā kā dostī kā ek din
phir sajegī pyaar ke ehsās kī ik anjuman

'nushūr' ahbāb-e-ḳhush-dil ko zarā hañs bol lene do
qayāmat hai agar ehsās-e-shā.ir aam ho jaa.e

tere ehsās meñ Dūbūñ to mahak jaa.e dimāġh
tujh ko sochūñ to mire jism meñ ḳhushbū aa.e

bahne vaalī nadiyā ko bhī kab is kā ehsās huā hai
kitnī khetī nashT huī hai jab is ne ruḳh pherā baabā

kahtī hai jo kahne do ye duniyā mujhe kyā hai
zindāni-e-ehsās meñ rusvā.ī kare kyā

hameñ har vaqt ye ehsās dāman-gīr rahtā hai
paḌe haiñ Dher saare kaam aur mohlat zarā sī hai

pa.e-iz.hār kuchh aisā nahīñ hai jo anokhā ho
har ik jazba purānā hai har ik ehsās baasī hai

ham kitnā ro.e the jab ik din sochā thā ham mar jā.eñge
aur ham se har nemat kī lazzat kā ehsās judā ho jā.egā

har ik ehsās kī pahchān ḳhatt-o-ḳhāl kho baiThī
vo apne aap meñ Duube hue gum-sum se rahte haiñ

zehn par bār-e-girāñ band qabā ke lams kā ehsās bhī
aur shahr-e-habs meñ rasta koī khultā nahīñ

tere ehsās kī tan pe chādar liye tere hamrāh raqsāñ meñ aise rahūñ
pyaar kī mujh pe badlī barastī rahe din nikaltā rahe shaam Dhaltī rahe

mere ehsās kī bīnā.ī hai ḳhushbū us kī
aag ban kar merī rag rag meñ utar jaatī hai

maiñ farq batā.ūñ kis kis ko ehsās kī jab taufīq nahīñ
kaif-e-ġham-e-daurāñ merā hai lutf-e-ġham-e-jānāñ merā hai

fankār aur fan ke taqāzoñ se nā-balad
ehsās-e-kamtarī hai to laḌ jaanā chāhiye

zabt-e-ehsās ham bhī kar leñge
is yaqīñ par 'sabā' gumān bhī thā