Tags-Eid

musalmāñ qarz le kar eid kā sāmāñ ḳharīdeñge
jo daanā haiñ vo becheñge jo haiñ nādāñ ḳharīdeñge

mere aage milī vo ġhairoñ se
hai moharram mujhe ye iid nahīñ

roza-dārān-e-judā.ī kuuñ ḳham-e-abrū-e-yār
māh-e-īd-e-ramazāñ thā mujhe ma.alūm na thā

guzrā mah-siyām na kyuuñ panja-e-sharāb
ḳhālī kā chāñd ye nahīñ hai māh-e-īd hai

tark in dinoñ jo yaar se guft-o-shunīd hai
ham ko moharram aur raqīboñ ko iid hai

aa.ī eid va dil meñ nahīñ kuchh havā-e-eid
ai kaash mere paas tū aatā bajā.e eid

mah-e-siyām meñ aayā jo vo hilāl-abrū
gumāñ huā ye mujhe chāñd iid kā niklā

vo roz ham ko guzartā hai jaise iid kā din
kabhī jo shakl tumhārī sahar ko dekhte haiñ

chehroñ se ḳhushiyāñ ojhal haiñ aur ġhamoñ se dil bojhal
ab ke apne des meñ niklā iid pe jaane kaisā chāñd

sajtī thī kabhī tan pe jo thī eid kī achkan
sajte the kabhī ham, to kabhī eid kī achkan

baiThe haiñ iid ko sab yaar baġhal meñ le kar
baiTheñ ham kyā dil-e-bīmār baġhal meñ le kar

chāñdnī shab hai sitāroñ kī ridā.eñ sī lo
iid aa.ī hai bahāroñ kī ridā.eñ sī lo

furāt-e-chashm pe hai karbalā kī tuġhyānī
darūn-e-kūfa-e-dil iid karne aayā huuñ

arsa-e-hashr īd-gāh huā
sab se mil leñge jab mileñge aap

jab qais pahāḌ is sar se Tale iid aa.ī tab aa.ī jaan meñ jaan
tā der ajab aalam meñ rahe hoñToñ ko milā.e jaam se ham

va.ada-e-vasl diyā iid kī shab ham ko sanam
aur tum jā ke hue shīr-o-shakar aur kahīñ

va.ada-e-vasl diyā iid kī shab ham ko sanam
aur tum jā ke hue shīr-o-shakar aur kahīñ

mar ga.e lākhoñ shahīd-e-nāz kuchh parvā nahīñ
vo tamāshā-e-hilāl-e-īd-e-qurbāñ meñ rahā

aaj kā din kaisā bā-raunaq hai bachcho vaah vaah
mard būḌhe hoñ ki bachche jā rahe haiñ eid-gāh

hamārī holī hai eid hai vo har ik ḳhushī kī umiid hai vo
vo paas aa.e to us se pūchheñ tū itne din se kahāñ thā pahle