Tags-Eid

merī ḳhushiyoñ se vo rishta hai tumhārā ab tak
iid ho jaa.e agar īd-mubārak kah do

bil-āḳhir phir aa hī gayā yaum-e-eid
vo din jo hamāre liye hai sa.iid

mauj-e-hañgām-e-charāġhāñ hai na vo rañg-e-abīr
shoḳhī-e-īd bhī ḳhāmosh moharram chup-chāp

māh-e-nau dekhne tum chhat pe na jaanā hargiz
shahr meñ eid kī tārīḳh badal jā.egī

ishrat-e-qatl-gah-e-ahl-e-tamannā mat pūchh
īd-e-nazzāra hai shamshīr kā uryāñ honā

iid hai qatl mirā ahl-e-tamāshā ke liye
sab gale milne lage jab ki vo jallād aayā

charbī mil kar insānoñ kī ik chehra daraḳhshāñ hotā hai
ye eid ke jalve bante haiñ jab ḳhūn-e-ġharībāñ hotā hai

nau-ḳhez dulhan aur eid kā din kapḌoñ se numāyāñ bad-halī
kumhlā.e hue se ġhunche-tar murjhā.ī huī sī hariyālī

ik mādar-e-muflis eid ke din bachchoñ ko liye bahlātī hai
sar un kā kabhī sahlātī hai narmī se kabhī samjhātī hai

tārīk dikhā.ī detī hai duniyā ye mah-o-ḳhurshīd use
rozī kā sahārā ho jis din vo roz hai roz-e-eid use

zardār namāzī eid ke din kapḌoñ meñ chamakte jaate haiñ
nādār musalmāñ masjid meñ jaate bhī huī sharmāte haiñ

muflis kī javānī eid ke din jab sub.h se aaheñ bhartī hai
duniyā ye amīroñ kī duniyā tab eid kī ḳhushiyāñ kartī hai

saañp ke badle bhaiñs ke aage chuhiyā biin bajā.egī
ab ke iid pe būḌhī ghoḌī laal lagām lagā.egī

ishq-e-mizhgāñ meñ hazāroñ ne gale kaTvā.e
īd-e-qurbāñ meñ jo vo le ke chhurī baiTh gayā

apne roza-dāroñ ko
iid kā chāñd dikhāo ab

dastūr hai duniyā kā magar ye to batāo
ham kis se mileñ kis se kaheñ iid mubārak

ġham hī ġham haiñ tirī ummīd meñ kyā rakkhā hai
iid aayā kare ab iid meñ kyā rakkhā hai

jitne mai-ḳhvār haiñ saaqī se gale milte haiñ
sahar-e-īd banī hai ḳhabar-e-jām-e-sharāb

kahīñ hai iid kī shādī kahīñ mātam hai maqtal meñ
koī qātil se miltā hai koī bismil se miltā hai

vo sub.h-e-īd kā manzar tire tasavvur meñ
vo dil meñ aa ke adā tere muskurāne kī