Tags-Eid

bhuul jaate haiñ har ik dāġh-e-jigar iid ke din
par vo lamhe jo tire saath guzāre hue haiñ

ho ke ḳhush kaTvāte haiñ apne gale
āshiqoñ kī īd-e-qurbāñ aur hai

maiñ tirī balā se ujaḌ gayā tirā hausla to nikal gayā
ye baḌī ḳhushī kā maqām hai ki ye iid bhī tire ghar huī

aks-e-abrū dekhte haiñ bāda-e-sar-josh meñ
iid hai sāqī-parastoñ meñ hilāl-e-jām kī

hilāl-e-īd banā hai kalīdī-e-aish-o-nashāt
jahāñ meñ bichh ga.ī phir se masarratoñ kī bisāt

daur-e-sabūhī shola-e-mīnā raqsāñ chhāñv meñ tāroñ kī
pīr-e-muġhāñ ne jaam uThāyā iid huī mai-ḳhvāroñ kī

paiġhām-e-zindagī hai ḳhushī kī naved hai
mere liye to aap kā dīdār iid hai

kis ne kahā hai ziist mire naam kījiye
do pal bhī saath aap kā īd-e-sa.īd hai

īd-e-nau-roz dil apnā bhī kabhī ḳhush karte
yaar āġhosh meñ ḳhurshīd hamal meñ hotā

mah-jabīñ iid meñ añgusht-numā kyuuñ na raheñ
iid kā chāñd hī añgusht-numā hotā hai

yaad aatā hai gale mil ke tirā pachhtānā
har na.ī iid meñ ye rañj nayā hotā hai

hilāl-e-īd kā har-chand ho jahāñ mushtāq
tumhārī abrūoñ kā sā ishāra kyā kartā

iid ko bhī vo nahīñ milte haiñ mujh se na mileñ
ik baras din kī mulāqāt hai ye bhī na sahī

ye chāñd raat hī dīdār kā vasīla hai
ba-roz-e-īd hī vo ḳhūb-rū nikaltā hai

kahāñ kā ġharra-e-shavvāl kaisā ashra zī-hijja
hameñ haath aa.e mai jis din ham us din iid karte haiñ

sab se yaqīn uThāyā ham ne dost paḌosī din tārīḳh
īd-milan ko ghar se nikle shor-e-mātam hone lagā

is mahīna bhar kahāñ thā sāqiyā achchhī tarah
aa idhar aa iid to mil leñ zarā achchhī tarah

baaġh meñ ham mar ga.e mahrūm-e-vasl-e-gul-badan
haiñ hamāre aaj phuul aur bulbuloñ ke haq meñ iid

ek ne.amat tire mahjūr ke haath aa.ī hai
iid kā chāñd charāġh-e-shab-e-tanhā.ī hai

us se milnā to use eid-mubārak kahnā
ye bhī kahnā ki mirī eid mubārak kar de