Tags-Eid

āñkhoñ meñ phire hai juuñ mah-e-īd
abrū kā tire hilāl din raat

zahe-qismat hilāl-e-eid kī sūrat nazar aa.ī
jo the ramzān ke bīmār un sab ne shifā paa.ī

sahr-e-gah-e-īd meñ daur-e-subū thā
par apne jaam meñ tujh bin lahū thā

tumhāre bin ab ke jān-e-jāñ maiñ ne iid karne kī Thaan lī hai
ġhamoñ ke ek ek pal se ḳhushiyāñ kashīd karne kī Thaan lī hai

janāb ke ruḳh-e-raushan kī diid ho jaatī
to ham siyāh-nasīboñ kī iid ho jaatī

tujh ko merī na mujhe terī ḳhabar jā.egī
eid ab ke bhī dabe paañv guzar jā.egī

mahak uThī hai fazā pairahan kī ḳhushbū se
chaman diloñ kā khilāne ko eid aa.ī hai

iid ho jaa.e abhī tālib-e-dīdāroñ ko
khol do zulf se gar chāñd se ruḳhsāroñ ko

aa.ī eid va dil meñ nahīñ kuchh havā-e-eid
ai kaash mere paas tū aatā bajā.e eid

jitne haiñ jāma-zeb jahāñ meñ sabhoñ ke biich
sajtī hai tere bar meñ sarāpā qabā-e-eid

qurbān sau tarah se kiyā tujh par aap ko
tū bhī kabhū to jaan na aayā bajā.e eid

kisī hasīñ se lipaTnā ashad zarūrī hai
hilāl-e-īd to koī subūt-e-īd nahīñ

maiñ sar-ba-ḳhāk huuñ taaki vo surḳh-rū ho jaa.e
bapā jo mātam-e-dil ho to phir ho iid us kī

dil meñ aate hī ḳhushī saath hī ik ġham aayā
iid aa.ī to maiñ samjhā ki moharram aayā

iid ke ba.ad vo milne ke liye aa.e haiñ
iid kā chāñd nazar aane lagā iid ke ba.ad

sabhī ne eid manā.ī mire gulistāñ meñ
kisī ne phuul piro.e kisī ne ḳhaar chune

baḌā ġhazab hai ḳhudavand-e-kausar-o-tasnīm
ki roz-e-eid bhī tabqoñ kā imtiyāz rahā

ba-faiz-e-eid bhī paidā huī na yak-rañgī
koī malūl koī ġham se be-niyāz rahā

hamāre zauq-e-nazāra ko eid din bhī
kahīñ pe sāya-e-zulmat kahīñ pe nuur milā

ajab thī eid-e-ḳhumistāñ ajab thā rañg-e-nashāt
kisī ne bāda-o-sāġhar kisī ne ashk piye