Tags-Eid

aap idhar aa.e udhar diin aur īmān ga.e
iid kā chāñd nazar aayā to ramzān ga.e

eid ab ke bhī ga.ī yūñhī kisī ne na kahā
ki tire yaar ko ham tujh se milā dete haiñ

eid aa.ī tum na aa.e kyā mazā hai eid kā
eid hī to naam hai ik dūsre kī diid kā

ġham ke pīchho raast kahte haiñ ki shādī hove hai
hazrat-e-ramzāñ ga.e tashrīf le ab iid hai

iid kā din to hai magar 'ja.afar'
maiñ akele to hañs nahīñ saktā

hamārī saal meñ do baar jaan jaatī hai
vo shaḳhs roz hī ik iid karne vaalā thā

ḳhud to aayā nahīñ aur iid chalī aa.ī hai
iid ke roz mujhe yuuñ na satā.e koī

mil ke hotī thī kabhī eid bhī dīvālī bhī
ab ye hālat hai ki Dar Dar ke gale milte haiñ

kyā ḳhabar hai ham se mahjūroñ kī un ko roz-e-īd
jo gale mil kar baham sarf-e-mubārakbād haiñ

rahnā pal pal dhyān meñ
milnā iid ke iid meñ

qalb o nigāh kī ye iid uf ye ma.āl-e-qurb-o-dīd
charḳh kī gardisheñ tujhe mujh se chhupā ke rah ga.iiñ

hāsil us mah-laqā kī diid nahīñ
iid hai aur ham ko iid nahīñ

janāb-e-shaiḳh bhī aa jaa.eñ to pilā.ūñ unheñ
ye māh-e-īd hai 'sābir' mah-e-siyām nahīñ

eid kā din hai so kamre meñ paḌā huuñ 'aslam'
apne darvāze ko bāhar se muqaffal kar ke

aaj pahle-pahal tajraba ye huā iid hotī hai aisī ḳhabar hī na thī
chāñd ko dekhne ghar se jab maiñ chalī dūsrā chāñd mere qarīb aa gayā

ham se bāñTī na ga.iiñ bachchoñ meñ ḳhushiyāñ ab ke
iid ke din rasan-o-dār uThā laa.e haiñ

iid ko hai nāznīnoñ sehat-e-'nāzim' kā jashn
hoñ na.ī ārā.isheñ utreñ purānī chūḌiyāñ

shādī se ġham-e-jahāñ meñ vo chand ham ne paayā
hai iid ek din to das roz yaañ dahā hai

naujavānī kī diid kar liije
apne mausam kī iid kar liije