Tags-Election

mujhe raqīb samajh kar jo mere mohsin haiñ
mirī nazar kā hasīñ intiḳhāb chāhte haiñ

ishq ne kaunain par Daalī nazar
husn par Thahrī nigāh-e-intiḳhāb

tarmīm hazf aur izāfe ke saath saath
ye kulliyāt pur hai mire intiḳhāb se

ḳhudā kare ki nazar kāmyāb ho jaa.e
tirī nazar meñ mirā intiḳhāb ho jaa.e

na kyuuñ ho da.avā barābarī kā vahāñ milā til yahāñ suvaidā
ye nuqta-e-intiḳhāb-e-āriz hai vo nuqta-e-intiḳhāb-e-āriz

muskurāne kā fan to ba.ad kā hai
pahle saa.at kā intiḳhāb karo

har intiḳhāb yahāñ māzī-o-aqab kā hai
savāl merā nahīñ hai mire nasab kā hai

rañgīni-e-libās kā jamm-e-ġhafīr hai
shāyad ki maiñ na aa.uuñ tire intiḳhāb meñ

intiḳhāb-e-ahl-e-gulshan par bahut rotā hai dil
dekh kar zāġh-o-zaġhan ko ḳhushnavāoñ kī jagah

hamārā intiḳhāb achchhā nahīñ ai dil to phir tū hī
ḳhayāl-e-yār se behtar koī mehmān paidā kar

kuchh samajh kar hī kiyā hai maiñ ne us kā intiḳhāb
kyā huā us raah meñ gar naqsh-e-pā koī nahīñ

the bāġh-e-zindagī ke usī se hī āb-o-rañg
dīvān-e-umr kā bhī vahī intiḳhāb thā

likkhe ga.e bayāzoñ meñ ash.ār-e-intiḳhāb
raa.ij rahe vahī ki jo sikke khare hue

koī milā hī nahīñ jis se hāl-e-dil kahte
milā to rah ga.e lafzoñ ke intiḳhāb meñ ham

mirī tarah koī nā-kāmyāb ho na sakā
kisī nigāh meñ bhī intiḳhāb ho na sakā

tohfa deñge tumheñ jo phūloñ kā
ham ko bhī intiḳhāb aatā hai

saroñ se taaj baḌe jism se abā.eñ baḌī
zamāne ham ne tirā intiḳhāb dekh liyā

mere ash.ār sab bayāzī haiñ
ham-nashīñ fikr-e-inteḳhāb abas

maiñ kaisī rāhoñ meñ kho ga.ī huuñ
sabhī qusūr intiḳhāb meñ hai

nayā adam koī na.ī hadoñ kā intiḳhāb ab
utaar luuñ maiñ ruḳh se ye davām kā naqāb ab