Tags-Etibaar

tere har ravayye meñ bad-gumāniyāñ kaisī
jab talak hai duniyā meñ e'tibār-e-duniyā kar

ādatan tum ne kar diye va.ade
ādatan ham ne e'tibār kiyā

mujhe pata hai kisī meñ ye shai nahīñ maujūd
har ek shaḳhs meñ kyuuñ e'tibār DhūñDhtā huuñ

kyā raaz hai ki jis ko batāne se peshtar
apnā bhī e'tibār nahīñ kar rahā huuñ maiñ

mujh se bigaḌ ga.e to raqīboñ kī ban ga.ī
ġhairoñ meñ baT rahā hai mirā e'tibār aaj

vo saath thā to muqaddas the mere saare hurūf
bichhaḌ gayā hai to lafzoñ kā e'tibār uThā

vaqt se fā.eda uThā lekin
vaqt kā koī e.atibār na kar

us ke fazl-o-karam pe rakh nazreñ
apne sajdoñ kā e.atibār na kar

jis ko ḳhud apnā e.atibār na ho
aise insāñ kā e.atibār na kar

tere va.adoñ kā e'tibār kise
go ki ho tāb-e-intizār kise

ab e'tirāf-e-ahd-e-vafā kar rahe haiñ vo
jab e.atibār-e-umr-e-gurezāñ nahīñ rahā

suḳhan ko aap ke ai hazrat-e-dil kis tarah mānūñ
kisī ko e.atibār aatā nahīñ hai qaul-e-dushman par

yūñhī roz aane ko kahte ho tum
nahīñ e'tibār ab tumhārā mujhe

jinheñ mahfiloñ se ġharaz na thī vo jo qaid apne gharoñ meñ the
vahī e.atibār-e-zamāna the vahī log dīda-varoñ meñ the

kashti-e-e'tibār toḌ ke dekh
ki ḳhudā bhī hai nā-ḳhudā hī nahīñ

maiñ ki tanhā e'tibār-e-zāt khone se huā
jo huā vo dil meñ shak kā biij bone se huā

ufuq ke nuur se gar mutma.in na ho paao
nasīm-e-sub.h kā to e'tibār karte chalo

use kisī kī mohabbat kā e'tibār nahīñ
use zamāne ne shāyad bahut satāyā hai

nigāh-e-nāz kā hāsil hai e'tibār mujhe
havā-e-shauq zarā aur bhī nikhār mujhe

nazar kā nashsha badan kā ḳhumār TuuT gayā
ki ab vo ā.īna-e-e'tibār TuuT gayā